“რეალი” და “ატლეტიკო” ქულებს კარგავენ, ლიდერი “ალავესია”

“ბარსა”-“სევილიას” მატჩის დაწყებამდე, საკუთარი შეხვედრები ლა ლიგის ცხრილის სათავეში მყოფმა სხვა გუნდებმა გამართეს. 

პირველი “ალავესი” იყო, რომელმაც გუშინ სტუმრად “სელტა” 1-0 დაამარცხა და გალიდერდა, დღეს კი მადრიდულმა გუნდებმა ითამაშეს.

“რეალი” “სანტიაგო ბერნაბეუზე” “ლევანტეს” დაუპირისპირდა. თამაში მოულოდნელად დაიწყო: ხოსე ლუის მორალესის და როხერ მარტის გოლებით, მე-13 წუთზე სტუმრები უკვე 2-0-ს იგებდნენ. ლოპეტეგის გუნდმა ვითარების გამოსწორება ვერ მოახერხა. “ბლანკოსმა” მხოლოდ ერთი გოლი გაქვითა, 71-ე წუთზე მარსელომ შეაგდო. 

“ატლეტიკომ” მე-9 ტურის მატჩი გასვლაზე, “ვილიარეალთან” გამართა. უგოლო პირველი ტაიმის შემდეგ, ანგარიში 51-ე წუთზე ფილიპე ლუისმა გახსნა, თუმცა მასპინძლებმა მალე გაათანაბრეს და შეხვედრა 1-1 დასრულდა. 

შესაბამისად, ცენტრალური თამაშის წინ, პირველ ადგილზე ბასკები არიან. მათ 17 ქულა აქვთ, “ატლეტიკოს” 16, რეალს კი – 14. ამ წუთისთვის, “სევილია” 16 ქულით მეორე ადგილზეა, “ბარსა” კი, 15-ით, მეოთხეზე. ანდალუსიელების დამარცხების შემთხვევაში, კატალონიელები ლიდერობას დაიბრუნებენ.