48 საათი ბრიტანელებთან შეთანხმების მიღწევისთვის

“ბარსელონას” შემადგენლობაში 27 ფეხბურთელი ირიცხება, რაც იმას ნიშნავს, რომ სატრანსფერო ფანჯრის მიმდინარეობისას გუნდი მინიმუმ ორმა მოთამაშემ უნდა დატოვოს. იმ ფეხბურთელების შეძენა კი, რომლებიც მომდევნო სეზონისთვის ერნესტო ვალვერდეს გეგმებში საერთოდ არ შედიან, ძირითადად პრემიერ ლიგის კლუბებს სურთ. ინგლისში ტრანსფერების უფლება გუნდებს მხოლოდ 9 აგვისტომდე აქვთ, ანუ, “ბარსამ” შეთანხმებებს უახლოეს 48 საათში უნდა მიაღწიონ. 

მიმდინარე მოლაპარაკებებში ამ დროისთვის ასეთი სიტუაციაა:

იერი მინა (“ევერტონი”, “მანჩესტერ იუნაიტედი”) – “ბარსელონა” 40 მილიონს ითხოვს, მაგრამ თუ შეთანხმება ბოლო წუთებამდე არ შედგა, შეიძლება, კოლუმბიელის ფასი შეამციროს;

ანდრე გომეში (“ვესტ ჰემი”) – კატალონიელები ტრავმირებული ნახევარმცველის სანაცვლოდ ნებისმიერ თანხაზე თანახმა არიან;

პაკო ალკასერი (“საუთჰემპტონი”) – ვალვერდემ სუარესის შემცვლელად გუნდში მუნირის დატოვება არჩია, ალკასერის სანაცვლოდ კი ბრიტანელები არც ისე ცოტას გადაიხდიან;

მარლონ სანტოსი (“ვესტ ჰემი”, “ლესტერი”, “საუთჰემპტონი”) – საკმაოდ დიდი ინტერესიდან გამომდინარე, შეთანხმების მიღწევის შანსი დიდია;

რაფინია (“არსენალი”) – ლონდონელებს ბრაზილიელის შეძენა უკვე დიდი ხანია, უნდათ, მაგრამ პრე-სეზონში მისი კარგი თამაშის გამო, დიდი ალბათობით, “ბარსელონა” მის გაყიდვაზე უარს იტყვის;

იასპერ სილესენი – ჰოლანდიელი მეკარით არაერთი კლუბი ინტერესდება, მაგრამ “ბარსას” მისი შენარჩუნება სურს;

სერჟი სამპერი – ფეხბურთელი, რომელსაც მძიმე ტრავმამ გასული სეზონის დიდი ნაწილი გამოატოვებინა და გულშემატკივრების დიდ ნაწილს მისი სახელიც დაავიწყა. “ბარსელონას” სერჟის თავისთან დატოვება არ უნდა, მაგრამ ჯერჯერობით არც მისი წაყვანის მსურველი ჩანს.