ვერატი იურისტებთან კონსულტაციებს გადის

როგორც ჩანს, მარკო ვერატის ირგვლივ ატეხილი სატრანსფერო საგა ახალ ფაზაში გადადის. El Mundo Deportivo-ს ინფორმაციით, 24 წლის იტალიელმა ნახევარმცველმა უკვე საბოლოოდ გადაწყვიტა საფრანგეთის დატოვება და პსჟ-ს დასატოვებლად კიდევ ერთი ნაბიჯი გადადგა.

უკვე ყველასთვის ცნობილია, რომ ამ ტრანსფერს ნასერ ალ-ხელაიფი აფერხებს, რომელიც არ აპირებს თავისი გუნდის ერთ-ერთი საკვანძო ფიგურა ესპანურ გრანდში გაუშვას.
ვერატი კი ყველაფერს აკეთებს, რომ თავისი მომავალი თავად გადაწყვიტოს და ამჟამინდელ კლუბში იძულებით თამაში არ მოუწიოს. გავრცელებული ინფორმაციით, ის თავის ადვოკატებს ესაუბრა. იტალიელ ნახევარმცველს აინტერესებდა შედეგები, რომლებიც 4 ივლისს პსჟ-ს პრესეზონზე მის არ გამოცხადებას მოჰყვება. მან იცის, რომ ასეთ შემთხვევაში დიდი ალბათობის სანქციებს დააკისრებენ, თუმცა ისიც იცის, რომ თუ სეზონს პსჟ-სთან ერთად დაიწყებს, იგი კატალონიურ გრანდს დაშორდება – შესაბამისად, იგი მზადაა გარისკოს.

თავის მხრივ, მხარეები ცდილობენ ყველასთვის მისაღები გამოსავალი მოძებნონ, “ბარსელონას” აზრით კი ეს შემდეგში მდგომარეობს: ვერატი ლურჯ-ბროწეულისფერ ფორმას მოირგებს, პსჟ კი სანაცვლოდ იმაზე გაცილებით მეტ თანხას მიიღებს, ვიდრე 5 სეზონის წინ იტალიელში გადაიხადეს (12 მილიონი ევრო).

24 წლის ვერატის კლუბთან ამჟამად კონტრაქტი 2021 წლამდე აკავშირებს და როგორც ცნობილია, მან თავის აგენტს, დონატო დი კამპლის მიმართა, რომ ნებისმიერ ფასად დაიწყოს მოლაპარაკებები “ბარსელონასთან” და ფეხბურთელმა მომავალ სეზონში მესისთან, ინიესტასთან და კიდევ უამრავ ვარსკვლავთან ერთად თამაში შეძლოს. მოლაპარაკებები სავარაუდოდ დიდხანს გაგრძელდება, მაგრამ ფეხბურთელის დიდი სურვილი და მონდომება ამ პრობლემის მთავარი გასაღებია.