“ბარსელონაში” ჰანსი ფლიკის მესამე სეზონმა ახლახან აიღო სტარტი და პირველი გუნდის რამდენიმე დეპარტამენტმა უკვე მნიშვნელოვანი ცვლილებები განიცადა. ყველაზე შესამჩნევი ძვრები ფიზიკური მომზადების კუთხით მოხდა, სადაც მთავარი პასუხისმგებელი პირი, ხულიო ტოუსი, ოპტიმიზაციისა და წარმადობის ახალ განყოფილებაში გადაიყვანეს. ტოუსთან ერთად, მისი ორი ასისტენტი – რაფა მალდონადო და ხერმან ფერნანდესი მუშაობას სარეზერვო გუნდში გააგრძელებენ.
ცვლილებები კვებისა და ფიზიოთერაპიის კუთხით
შემდეგ ცვლილებები კვების დეპარტამენტსაც შეეხო. სილვია ტრემოლედამ, რომელიც ბოლო ხუთი წლის განმავლობაში პირველი გუნდის მთავარი ნუტრიციოლოგი იყო, კლუბის განცხადებით, პირადი მიზეზების გამო დაკავებული თანამდებობა დატოვა.
როგორც გამოცემა AS იტყობინება, ახლა ფიზიოთერაპიის განყოფილების ჯერიც დადგა. ირკვევა, რომ ბორხა პორტილიო პირველ გუნდში მუშაობას აღარ გააგრძელებს.
ახალი სახეები და მთავარი მიზანი
ცხადია, ამდენი ცვლილება ყველა დონეზე რესტრუქტურიზაციასა და ახალი პროფესიონალების დამატებას მოითხოვს. ფიზიკური მომზადების კუთხით, ყველაზე ცნობილი სახე გერმანელი ბენჟამინ კუგელი იქნება, რომელიც ხულიო ტოუსს ჩაანაცვლებს. ფლიკი მას კარგად იცნობს, რადგან გერმანიის ნაკრებში ისინი ერთად მუშაობდნენ. ამ სფეროში ის ერთადერთი ახალი სახე არ იქნება: პირველ გუნდს ლუკას დელ კამპოც შეუერთდება, რომელიც აქამდე ქალთა გუნდში მოღვაწეობდა.
პირველი გუნდის ახალი ნუტრიციოლოგი მირეია პორტა ოლივა იქნება, რომელმაც ქალთა გუნდში შესანიშნავად იმუშავა. AS-ის ინფორმაციით, ფიზიოთერაპევტ სერხიო ტოროს, რომელიც ბორხა პორტილიოს შეცვლის, მხარს ფიზიოთერაპიის დეპარტამენტის ხელმძღვანელი რაულ მარტინესი უჭერს.
ეჭვგარეშეა, რომ გუნდში ბევრი ცვლილება და ახალი სახეა. ისინი დღეს “სიუტატ ესპორტივას” ბაზაზე ერთმანეთს პირველად შეხვდებიან. მათ სათავეში ჰანსი ფლიკი უდგას, რომელიც ამ ცვლილებებით ყველა დონეზე სრულყოფილების მიღწევას ცდილობს, რათა ფეხბურთელებს მიმდინარე სეზონის მთავარი გამოწვევის – ჩემპიონთა ლიგის მოგებაში დაეხმაროს.
ოოო კარგია კარგია