მოსალოდნელი და მოულოდნელი მოტივები – სუპერ ლიგის მოლოდინში

 ოფიციალურად დადასტურდა ევროპის სუპერ ლიგის შექმნა, რომლის მუდმივი წევრებიც ევროპული ფეხბურთის გრანდები იქნებიან, მათ შორის „ბარსელონაც“. ფორმატის შესახებ უკვე ცნობილია, ასევე, The New York Times-ის ინფორმაციით, გუნდები ტურნირზე რეგისტრაციის შემთხვევაში 350 მილიონ ევროს მიიღებენ, რაც ძალიან დიდი თანხაა, მით უმეტეს, იმის გათვალისწინებით, რომ პანდემიისას ყველამ იზარალა.

UEFA-მ ჩემპიონთა ლიგისა და ევროპა ლიგის თამაშები გაურკვეველი დროით გააუქმა, ეს უკვე ომის დასაწყისია. 

გულშემატკივრის რეაქცია მკვეთრად უარყოფითია, მაგრამ თუ კარგად გავაანალიზებთ შექმნილ მდგომარეობას, ყველაფერი გასაგები გახდება, ზედმეტი ემოციებისა და აჟიტირების გარეშე.

რატომ განუდგნენ გრანდები UEFA-ს?

UEFA აღარ არის ისეთი პრესტიჟული ორგანიზაცია როგორიც ერთ დროს იყო, არც FIFA გამოირჩევა დიდი სანდოობით, მაგრამ FIFA-ს ყოველთვის ჰქონდა პრობლემები, აი ევროპის სტრუქტურა ბოლომდე ინარჩუნებდა პრესტიჟს, მაგრამ 21-ე საუკუნეში ყველაფერი შეიცვალა, იმდენი კორუფციული სკანდალი მოხდა, თანაც ისე ღიად და გაცხადებულად, რომ კითხვები აღარ დარჩენილა, ამ ორგანიზაციების დრო დათვლილია.

რა თქმა უნდა, არავინ აპატიებდა FIFA-ს იმას, რომ რუსეთს და კატარს მუნდიალი მიჰყიდეს, საყვედურობენ ახლა ინგლისს, მათი ექვსი წარმომადგენელი იქნება ახალ ტურნირზე, მაგრამ ეს მაშინ უნდა გახსენებოდათ, როცა მუნდიალის მასპინძლობაზე  უარი უთხრეს, მხოლოდ იმიტომ, რომ რუსეთის პრეზიდენტმა ძალიან დიდი თანხა გადაიხადა და სხვა რესურსებიც გამოიყენა, ინგლისელები კი დარჩნენ მშრალზე.

თანაც სულ რამდენიმე ხანში ეს ყველაფერი დადასტურდა, პატივცემული ბლატერი ოფიციალურად დაადანაშაულეს, სულ პანღურით გამოაგდეს თათბირიდან და ისე წააბრძანეს დაკითხვაზე, ჩვენთვის ეს უცხო არ არის, „ბარსას“ ზუსტად ასეთი ხალხი მართავდა, ხოდა ამოუვიდათ ყელში იმ ადამიანებს, რომლებიც ქმნიან თანამედროვე ფეხბურთს.

არავის დავიწყებია მიშელ პლატინის გასვრაც, პლატინის და ბეკენბაუერს მხოლოდ იმან უშველათ, რომ ძალიან დიდი ავტორიტეტი აქვთ, თორემ გისოსებს მიღმა ამოჰყოფდნენ თავს, თუმცა, პლატინიმ რაღაც ხნით მაინც ამოყო. თავის დროზე ყველას გაუკვირდა, რომ ისეთი უმწიკვლო რეპუტაციის მქონე კაციც გაისვარა როგორიც კაიზერ ფრანცია, მაგრამ ეს ორგანიზაციები ისე გაიხრწნა, რომ სუფთა კაცი იქ აღარ დარჩა, ნდობაც დაკარგეს და პრესტიჟულობაც.

რა მოტივი აქვთ გრანდებს?

ფეხბურთი ვითარდება, სულ უფრო მეტი ქვეყანა თამაშობს და უყურებს, ფასები კოლოსალურად იზრდება, მაგრამ ეს გასაგები და ლოგიკურია, მარტივი მაგალითი, რომ მოვიყვანოთ, მარადონას თამაშს 10 კაცი უყურებდა(დაშვების დონეზე), ათი კაცი იხდიდა ფულს სატელევიზიო უფლებებში, ეს ათი კაცის გადახდილი თანხა კი ათ ნაწილად იყოფოდა, ახლა ფეხბურთს 100 კაცი უყურებს, მესის თამაშის საყურებლად ბევრად მეტი ადამიანი იხდის თანხას, აი, თქვენ, რომ მაგთის ან სილკის აბონენტი ხართ და სილკ TV ან Adjara სატელევიზიო პროდუქტს გთავაზობთ, იმ თანხის ნაწილი ბევრ ნაწილად იყოფა და სულ მცირე ნაწილი ფეხბურთელებამდეც მიდის, ოღონდ საქმე ის არის, რომ UEFA ძალიან ბევრს იღებს, მხოლოდ იმაში, რომ თამაშების ორგანიზება შეძლოს და გადასარევი ჰიმნი გააჟღეროს, კოსტუმიანი ხალხი გამოყაროს დარბაზში და წილისყრა ჩაატარებინოს, ჰოდა, მიხვდნენ გრანდების ხელმძღვანელები, რომ ძალიან დიდ თანხას კარგავენ, ორგანიზებას კი თავადაც შეძლებენ.

როგორც ზემოთ ვახსენე, მონაწილეობა 350 მილიონი ევროს შემოსავალს მოიტანს, ეს პირველადი მონაცემებია, ზუსტია თუ არა მალე გავიგებთ, მაგრამ ძალიან დიდ თანხებზე როა საუბარი ფაქტია.

მარტივად, რომ ვთქვათ, გრანდებს აღარ უნდათ, რომ მათი ფული გაურკვეველმა ხალხმა, გაურკვეველი მიზნებით შეჭამოს.

რა ბერკეტი აქვს UEFA-ს და FIFA-ს?

უკვე გაიგებდით, რომ ფეხბურთელების დისკვალიფიკაციას აპირებენ, ვინ უნდა დაბლოკონ მესი და რონალდუ? ყველა ის ვარსკვლავი, რომელთა გამოც ხალხი ფეხბურთს უყურებს? ამჟამად შეძლეს ლა ლიგის, სერია ა-სა და პრემიერლიგის მმართველი ორგანოების აყოლიება, მაგრამ საქმე საქმეზე, რომ მიდგება, UEFA-ს ეტყვიან, რომ თავის საქმეს მიხედონ, შიდა ჩემპიონატი კი მათი საქმე არ არის.

ნაკრებში თამაშს აუკრძალავენ? იგივე მოხდება, რაც კლუბების შემთხვევაში ხდება, თავად მოახერხებენ ორგანიზებას, სპონსორებს იმდენს იპოვიან, რომ თვლა არ იქნება, ორგანიზება კი ძალიან ბევრ ორგანიზაციას შეუძლია, იქნებ ახალი საფეხბურთო ორგანოც შეიქმნას? ყველაფერი ამისკენ მიდის.

უბრალოდ, მუნდიალის თასს აღარ ექნება ისეთი ფორმა, როგორიც ახლა აქვს, სხვა თასის შექმნა მოუწევთ, ძალიან მომწონს ახლანდელი თასი, მის პირვანდელ ნიკეს თასს ბევრად მირჩევნია, მაგრამ ეს უბრალო ფორმალობაა.

ეს არის ის ბერკეტები, რაც ღიად ჩანს, მაგრამ უნდა ვიცოდეთ, რომ იქნება უამრავი ბერკეტი და კომპრომატი, რომელიც ჯერ არ ჩანს, ამ წლების განმავლობაში, UEFA-ს ძალიან ბევრი ადამიანის წინააღმდეგ ექნება კომპრომატი, რომელთა გამოყენებასაც შეეცდება, ამიტომ, დროთა განმავლობაში უფრო და უფრო მძიმე ამბები ამოიყრება.

რას კარგავს ფეხბურთი?

ახლა ამას ზუსტად ვერავინ იტყვის. 

პატარა გუნდები იზარალებენ? საწყის ეტაპზე ნაკლებად, თუ ალტერნატიულ ტურნირებს მოიფიქრებენ რაღაც გამოვა, მაგრამ დროთა განმავლობაში ზღვარი სულ უფრო მეტად გაიზრდება, ეს კიდე ვერ არის კარგი საქმე, ამით ფეხბურთის მთავარი პრინციპი იკარგება, მაგრამ სიმართლე ის არის, რომ ეს პრინციპი უკვე უგულებელყოფილია და ზღარი გრანდებსა და საშუალო დონის გუნდებს შორის, უკვე ისედაც კოლოსალურია. 

ქართული კლუბები იზარალებენ? არა. ფლეიოფამდეც ვერ მივდიოდით, მესამე საკვალიფიკაციო ეტაპამდე, ახლა კი სავარაუდოდ გაჩნდება ალტერნატიული ტურნირები, სადაც მონაწილეობის საშუალება ჩვენი დონის კლუბებსაც ექნებათ.

რა ბედი ელის ჩემპიონთა ლიგას? თუ არ გაუქმდა, ისეთივე მოსაწყენი გახდება, როგორც ევროპა ლიგაა ახლა, მეორე და მესამე ხარისხოვანი კლუბებით.

ჩემპიონთა ლიგამ თავი ამოწურა, ისევე როგორც ჩემპიონთა თასმა და ბაზრობათა თასმა, თავის დროზე.

არ დაგავიწყდეთ, რომ ჩემპიონთა ლიგა 1992 წელს დაარსდა, არც ისე ბებერი ტურნირია, უბრალოდ ბებერი UEFA ატარებდა, რომელიც უკვე სულს ღაფავს.

რა მოტოვი აქვს „ბარსას?“

კლუბს, რომელსაც მილიარდიანი ვალი აქვს, მის მოტივებზე საუბარი რთული არ უნდა იყოს. ეს გადაწყვეტილება „ბარსასთვის“ გადარჩენის ბილეთია, ახლა ამაზე უკან დახევა არ შეიძლება.

ჯერჯერობით უარს ამბობს „ბაიერნი“, მაგრამ სხვა გზა არ ექნებათ, თუ ამ ტურნირს არ შეუერთდებიან, დროთა განმავლობაში ისინიც მეორეხარისხოვან კლუბად იქცევიან, ამიტომ მოუწევთ.

რატომ ამბობს უარს პსჟ? აი ეს ყველაზე საინტერესო და ჩვენთვის ყველაზე სასეირო ამბავია, პსჟ-ს პრეზიდენტი UEFA-ს კომიტეტში შეძვრა და გვარიანი გავლენაც მოიპოვა, როგორ და რა გზებით, რთული მისახვედრი არ უნდა იყოს, თანაც კონტრაქტი გააფორმა, რომლის მიხედვითაც მისი კომპანია უზრუნველყოფს ტელეტრანსლაციებს კატარში და კიდევ რამდენიმე ქვეყანაში, ძალიანაც უნდა ახალი ტურნირი, მაგრამ UEFA-ს გადაგდება არ გამოდის, რადგან მათთან კონტრაქტი აკავშირებს. აი, ასე გაიჭედნენ პსჟ-ს პატიოსანი მმართველები.

სიახლეს ყველა რთულად იღებს

ჩემპიონთა ლიგა ჩემი ბავშვობის ყველაზე დიდი საჩუქარი იყო, ამ ტურნირის ჰიმნის გაგონებაზე ერთიანად მბურძგლავდა, ყოველი დღე დღესასწაული იყო, როცა ლიგის მატჩი მელოდა წინ, განსაკუთრებით „ბარსას“ მონაწილეობით, მაგრამ ყველაფერს რასაც აქვს დასაწყისი, აქვს დასასრულიც.

რაც არ უნდა მოხდეს, სიახლისთვის მზად უნდა ვიყოთ.