ბარსელონამ სასიხარულო სიახლე მიიღო ვუნდერკინდზე

“ბარსელონა” ზაფხულში სავარაუდოდ შეზღუდულად ჩაერთვება სატრანსფერო საქმიანობაში, რადგან ხელფასების საკითხი კვლავაც სერიოზულ პრობლემად რჩება. მიუხედავად იმისა, რომ ჟოან გარსიას ტრანსფერი დასრულებულია და კლუბი აგრძელებს ვინგერის ძიებას, სავარაუდოა, რომ ეს იქნება ის მცირე ცვლილებები, რაც კატალონიური კლუბი გააკეთებს.

ნახევარდაცვა, ალბათ, ბოლო ზონაა, სადაც “ბარსელონას” გაძლიერება ესაჭიროება – ამ პოზიციაზე საკმაოდ დიდი კონკურენციაა, თუმცა პრაქტიკულად ახალ დამატებად უნდა ჩაითვალოს მარკ ბერნალის დაბრუნება, რომელიც სერიოზული ტრავმის შემდეგ გუნდში ბრუნდება.

მოზარდმა ნახევარმცველმა სეზონი ჰანსი ფლიკის ხელმძღვანელობით სასტარტოში დაიწყო და მარკ კასადოსაც კი ამჯობინეს, თუმცა აგვისტოში “რაიო ვალეკანოსთან” მატჩში სერიოზული ტრავმა – ჯვარედინი მყესის დაზიანება – მიიღო და სეზონის ბოლომდე მოედანზე ვერ დაბრუნდა.

ბერნალი უკვე ერთი თვეა, სრული დატვირთვით ვარჯიშობს, რადგან ექიმებმა მას “მწვანე შუქი” აუნთეს. თავდაპირველად ვარაუდობდნენ, რომ იგი ტრავმის შემდეგ სრული ერთი წლის განმავლობაში ვერ ითამაშებდა – მის დაბრუნებას სექტემბრის დასაწყისისთვის ელოდნენ, რადგან დაზიანება აგვისტოს ბოლოს მიიღო.

თუმცა Cadena SER–ის ინფორმაციით, “ბარსელონა” აპირებს მისი დაბრუნება დააჩქაროს და მარკ ბერნალის სრულფასოვან ვარჯიშებში მონაწილეობას დაუშვებს სეზონისწინა მოსამზადებელი ეტაპის დაწყებისთანავე. ეს იმას ნიშნავს, რომ ბერნალს ექნება რეალური შანსი, რომ თავიდანვე იბრძოლოს სათამაშო წუთებისთვის. ფლიკი თავის ფეხბურთელებს შეკრებაზე 13 ივლისს დაიბარებს.

ბერნალი და კონკურენცია

მას შემდეგ, რაც ბერნალი ტრავმირებული იყო, მარკ კასადომ და ფრენკი დე იონგმა დაამტკიცეს, რომ პედრის გვერდით თამაში წარმატებით შეუძლიათ. კასადომ კარგი შთაბეჭდილება დატოვა “ბაიერნთან” და “რეალ მადრიდთან” გამართულ დიდ მატჩებში, ხოლო დე იონგმა ძირითად შემადგენლობაში ადგილი მოიპოვა.

თუმცა ბერნალს აქვს უნიკალური თვისებები – ფიზიკურობა და ტექნიკური უნარების ნაზავი – რაც არცერთ სხვა მოთამაშეს არ ახასიათებს. ეს კომბინაცია “ბარსელონას” შუა ხაზს განსხვავებულ ელემენტებს შემატებს.