ბარსელონას ბილეთების გაყიდვა ძალიან უჭირს

მიუხედავად რამდენიმე ობიექტური მიზეზისა, რომლებიც ნახევრად ცარიელ “კამპ ნოუს” ნაწილობრივ ამართლებს, მაინც უნდა ითქვას, რომ “ბარსელონას” საშინაო თამაშების ბილეთების გაყიდვა ძალიან უჭირს.

დღეს მე-2 თამაში იყო, რომლის დროსაც “კამპ ნოუს” სრულად შევსება იყო დაშვებული. “ვალენსიას” შეხვედრის დროს სტადიონის მხოლოდ 47% შეივსო, დღეს კი კიდევ უფრო ცოტა – 46%.

“კამპ ნოუ” იმდენად დიდი სტადიონია, რომ მისი ბოლომდე შევსება ყოველთვის რთულია. განსაკუთრებით ახლა, როდესაც ქალაქში ნაკლები ტურისტია, მოხუცი გულშემატკივრები ხალხმრავალ ადგილებში სიარულს ერიდებიან, ხოლო ქალაქის მცხოვრებთა ფინანსური მდგომარეობა გაუარესებულია. კონკრეტულად დღეს ამას არასახარბიელო დროც დაემატა – სამუშაო დღეს 18 საათსა და 45 წუთზე (ადგილობრივი დროით) თამაშისთვის სტადიონის გავსება ყოველთვის რთული იყო. მაგრამ მაინც – 2011 წელს ბატე-სთან გამართული შეხვედრის შემდეგ “კამპ ნოუ” ჩემპიონთა ლიგაზე ასე არ “შერცხვენილა”.

ობიექტური მიზეზები გასაგებია, მაგრამ 4 დღეში “ელ კლასიკოა” და “ბარსა” ამ თამაშის ბილეთების უპრობლემოდ გაყიდვასაც კი ვერ ახერხებს. ვინც “კლასიკოზე” ყოფილა, ყველამ იცის, თუ რამხელა პრობლემაა ბილეთის ყიდვა. ყველაზე იაფი ბილეთი პანდემიამდე 160 ევრო ღირდა – სულ ბოლო რიგში, ყველაფერი გაცილებით ცუდად რომ ჩანს, ვიდრე ტელევიზორში. რა თქმა უნდა, ამ ბილეთის ყიდვაც ძალიან რთული იყო, რადგან მსურველების რაოდენობა არსებული ბილეთებისას აჭარბებდა და საჭირო ხდებოდა ლატარიის გამართვა. რა ხდება ამჯერად? უკვე მე-20 დღეა, ბილეთის ყიდვა ნებისმიერ მსურველს შეუძლია, ფასიც უჩვეულოდ დაბალია – 99 ევროდან იწყება. თუმცა გასაყიდი ჯერ კიდევ ბევრი ბილეთია, იმდენად ბევრი, რომ დღეს “ბარსამ” ფასდაკლებაც კი გამოაცხადა. “ელ კლასიკოს” ბილეთი ფასდაკლებით, ამას ვინ წარმოიდგენდა…