ისტორიაში ყველაზე რთული მეტოქე ბარსელონასთვის

ჩემპიონთა ლიგის ჯგუფური ეტაპის წილისყრა ჩვენთვის სასიამოვნო შედეგით არ დასრულდა. მე-3 და მე-4 კალათებიდან ყველაზე სუსტი გუნდები ნამდვილად არ შეგვხვედრია, პირველიდან კი…

თამამად შეიძლება ითქვას, რომ “ბაიერნი” “ბარსელონას” ისტორიაში ყველაზე უხერხული მეტოქეა. ასე “ბარსელონას” არავისთან უჭირს.

არაესპანურ გუნდებთან “ბლაუგრანას” ყველაზე მეტი, 7 წაგება სწორედ “ბაიერნთან” აქვს. ესპანური გუნდები ამ მაჩვენებელში რატომ ჯობნიან, გასაგებია – ისინი “ბარსას” გაცილებით ხშირად ეთამაშებიან.

პროცენტულად რომ ავიღოთ – “ბაიერნთან” გამართული თამაშების 64% წაგებული გვაქვს. ყველაზე ცუდი შედეგი “ინტერნასიონალის”, “სან პაულუს”, “სლოვანის”, “ფიგეროსის”, “ნოველდასა” და “დანდი იუნაიტედის” შემდეგ. პირველ 5 მათგანს ისტორიაში სულ თითოჯერ ვეთამაშეთ, “დანდი იუნაიტედს” კი – ოთხჯერ. იმ გუნდებს შორის, რომლებსაც მეტნაკლებად სტაბილურად ვხვდებით, გამოკვეთილად ყველაზე ცუდი შედეგი გვაქვს “ბაიერნთან”. შედარებისთვის, “რეალთან” თამაშების მხოლოდ 40% გვაქვს წაგებული.

“ბაიერნთან” გამართული 9 დაპირისპირებიდან 7 წავაგეთ და მხოლოდ 2 მოვიგეთ. ის 2 მოვიგეთ “კამპ ნოუზე”, მარტივად, 4-0 და 3-0, 2009 და 2015 წლებში. ისტორია გვეუბნება, რომ “ბარსელონა” “ბაიერნს” მხოლოდ მაშინ უგებს, როდესაც ობიექტურად მსოფლიოს საუკეთესო გუნდია. “ბაიერნთან” მოგება ჩვენთვის ტრებლის მოგებასთანაც ასოცირდება.

“ბაიერნთან” ბოლო თამაშის შედეგს აღარც გაგახსენებთ…

ცუდი მოგონებები არა მხოლოდ “ბაიერნთან”, არამედ ჯგუფის კიდევ ერთ წევრთან გვაკავშირებს. კიევის “დინამოს” 12 შეხვედრიდან 8 კი მოვუგეთ, მათ შორის ბოლო ოთხი, მაგრამ სტაჟიან გულშემატკივარს 1997 წელს აბა რა დაავიწყებს. კიევში 0-3 წავაგეთ. “კამპ ნოუზე” რევანშისთვის ვემზადებოდით და უკრაინელებმა ისეთი იკადრეს, “ბაიერნსაც” რომ არ უკადრებია – ანდრეი შევჩენკოს ჰეთ თრიქი და “კამპ ნოუზე” ანგარიშით 0-4 განადგურებული “ბარსელონა”.

ყველაზე კარგად საქმე “ბენფიკასთან” გვაქვს. 7 თამაშში 3 მოგება და მხოლოდ 1 მარცხი, ისიც შორეულ 1961 წელს, ამ გუნდების პირველ დაპირისპირებაში. დანარჩენ 6 შეხვედრაში, მათ შორის ბოლო ოთხში, “ბარსა” არათუ არ აგებდა, გოლსაც კი არ უშვებდა.