ვილიარეალი-ბარსელონა – მატჩისწინა მიმოხილვა

“ბარსელონა”, ხვალ, 5 ივლისს, ლა ლიგის 34-ე ტურის მატჩში, თბილისის დროით 23 საათსა და 55 წუთზე, “ვილიარეალს” ესტუმრება.

ესპანეთის ჩემპიონობისთვის მებრძოლი კატალონიური გუნდი, ამჟამად, ლა ლიგის სატურნირო ცხრილში, 70 ქულით, მე-2 ადგილზე იმყოფება და ლიდერ მადრიდის “რეალს” 4 ქულით ჩამორჩება, თუმცა შეხვედრამდე მათ შორის სხვაობა, შესაძლოა, 7 ქულამდე გაიზარდოს.

რაც შეეხება “ვილიარეალს”, “წყალქვეშა ნავი”, 54 ქულით, მე-5 პოზიციაზე იყოფება და დიდი მიზნებისთვის იბრძვის.

გუნდების სათამაშო ფორმა

“ბლაუგრანა”, სეზონის განახლების შემდეგ, საუკეთესო ფორმაში ნამდვილად არ იმყოფება. კატალონიელებმა 6 შეხვედრიდან 3 მოიგეს და ამდენივე ფრედ ითამაშეს. გუნდმა შესაძლო 18 ქულიდან 12 ქულის მოგროვება შეძლო.

“ლურჯ-ბროწეულისფერებს” ძალიან რთული სიტუაცია აქვთ გასვლით მატჩებში. მათ ესპანეთის ჩემპიონატის მიმდინარე გათამაშებაში სტუმრად ჩატარებული 16 შეხვედრიდან მხოლოდ 6 მოიგეს, 5 ფრედ ითამაშეს, ამდენივე კი წააგეს.

“ბარსელონას” საპირისპიროდ, შესანიშნავ ფორმაში იმყოფება “ვილიარეალი”. “ყვითლებმა”, სეზონის განახლების შემდეგ, 6 თამაშიდან 5 მოიგეს, 1 კი ფრედ დაასრულეს. მათ სახლში ჩატარებული 16 შეხვედრიდან 8 მოიგეს, 5 ფრედ ითამაშეს, 3-ში კი დამარცხნდენ. გუნდმა ბოლო მატჩში “ბეტისს” გასვლაზე 2-0 მოუგო.

ურთიერთშეხვედრები

“ბარსელონას” “ვილიარეალთან” ცუდი სტატისტიკა ნამდვილად არ აქვს. ეს გუნდები ლა ლიგის ისტორიაში ერთმანეთს 30-ჯერ შეხვდნენ, რომელთაგან კატალონიელებმა მხოლოდ 3 მატჩი წააგეს, 20 მოიგეს, 7 კი ფრედ ითამაშეს.

“ბარსა” და “ვილიარეალი” ბოლოს ერთმანეთს სექტემბერში დაუპირისპირდნენ. “ბლაუგრანამ”, “კამპ ნოუზე”, ანტუან გრიზმანისა და არტურის ბრწყინვალე გოლის წყალობით 2-1 მოიგო.

სტატისტიკა

“ბარსელონას”, ლა ლიგის მიმდინარე გათამაშებაში, 33 მატჩიდან 21 მოგება, 7 ფრე და 5 წაგება აქვს. კატალონიელებმა 75 გოლი გაიტანეს, 35 ბურთი კი გაუშვეს. მათ კარი მშრალად 12-ჯერ შეინახეს.

“ბლაუგრანა” საშუალოდ 2.24 გოლს იტანს, 1.06-ს კი უშვებს. სათამაშო დრო 15-წუთიან მონაკვეთებად რომ დავყოთ, “ლურჯ-ბროწეულისფერებს” ყველაზე ხშირად 30-45 წუთის (23%) მონაკვეთში გააქვთ.

რაც შეეხება “ვილიარეალს”, გუნდმა 33 თამაშიდან 16 მოიგო, 6 ფრედ ითამაშა, 11 კი წააგო. “ყვითლებმა” 53 გოლი გაიტანეს, 40 ბურთი კი გაუშვეს. მათ კარი მშრალად 11-ჯერ შეინახეს.

“წყალქვეშა ნავი” საშუალოდ 1.61 გოლს იტანს, 1.21-ს კი უშვებს. მას უმეტეს შემთხვევაში 0-15 და 75-90 წუთის (20.8%) მონაკვეთებში გააქვს.

საინტერესო ფაქტები

• “ბარსელონა” “ვილიარეალთან” ბოლო 23 მატჩში დაუმარცხებელია.
• კატალონიელები “ვილიარეალთან” ბოლო 6 თამაშში სულ მცირე 2 გოლს იტანენ.
• “ყვითლებმა” ლა ლიგის ბოლო 6 შეხვედრაში კარი მშრალად 5-ჯერ შეინახეს.
• “ვილიარეალის” ბოლო 6 თამაშიდან 5-ში 2.5-ზე ნაკლები გოლი გავიდა.
• “ბარსელონა” პრიმერა დივიზიონის ბოლო 7 მატჩში დაუმარცხებელია.
• “ვილიარეალს” ესპანეთის ჩემპიონატის ბოლო 3 შეხვედრაში სულ მცირე 2 გოლი გააქვს.

დანაკლისი

უკვე ჩვეულებრივი რამაა, რომ “ბარსელონას” ტრავმირებული უსმან დემბელე არ ეყოლება. ფრანგი ფეხბურთელი არცერთ დარჩენილ მატჩში მონაწილეობას არ მიიღებს. დემბელეს გარდა, დაზიანების გამო, არ ითამაშებენ ფრენკი დე იონგი და სამუელ უმტიტიც.

“ბარსელონას” განაცხადი.

ხავი კალიეხას გუნდს ცენტრალური მცველი რამირო მორი, ნახევარმცველი რამირო გუერა და სოფიან ჩაკლა დააკლდებიან. ასევე, საეჭვოა ნახევარმცველი ვისენტე იბორას თამაშიც, თუმცა ეს “ვილიარეალისთვის” სერიოზული დანაკლისი ნამდვილად არაა. შეიძლება ითქვას, “ყვითლები” ოპტიმალური შემადგენლობით ითამაშებენ.

მწვრთნელები მატჩის წინ

კიკე სეტიენი: “არახელსაყრელ მდგომარეობაში ვიმყოფებით, თუმცა კვლავ ვცოცხლობთ. ყველა დარჩენილი თამაშის მოსაგებად ვიბრძოლებთ”. სეტიენის სრული კომენტარი.

ხავი კალიეხა: “დიდი მოტივაცია, სურვილი და რწმენა გვაქვს იმისა, რომ შეგვიძლია მსოფლიოს ერთ-ერთ საუკეთესო გუნდთან 3 ქულა მოვიპოვოთ”.

მსაჯი

მატჩს 44 წლის არბიტრი კარლოს დელ სერო გრანდე განსჯის. გრანდეს კატალონიელთა 29 მატჩში უმსაჯია. აქედან “ბლაუგრანამ” 22 შეხვედრა მოიგო, 3 – ფრედ ითამაშა, 4 კი – წააგო.

მადრიდელმა არბიტრმა მიმდინარე სეზონში “ბარსელონას” 3 თამაშში იმსაჯა, რომელლებშიც კატალონიელებს მოგება, წაგება და ფრეც აქვს. მან “ლურჯ-ბროწეულისფერებს” 5 ყვითელი და 1 წითელი ბარათი უჩვენა.

გრანდეს “ვილიარეალის” 20 მატჩში უმსაჯია. აქედან “ყვითლებმა” 13 მოიგეს, 4 ფრედ ითამაშეს, 3 კი წააგეს.

სავარაუდო შემადგენლობები

ბარსელონა (4-3-3): ტერ შტეგენი; ს. რობერტო, პიკე, ლანგლე, ალბა; ბუსკეტსი, ვიდალი, პუჩი; მესი, სუარესი, გრიზმანი.

ვილიარეალი (4-4-2): ასენხო; გასპარი, ალბიოლი, ტორესი, მორენო; ჩუკვუეზე, იბორა, ანგიუსა, კასორლა; ალკასერი, მორენო.