მადრიდის “რეალი” ლაუტაროსთვის ბრძოლაში ერთვება

ლაუტარო მარტინესის ტრანსფერი თითქმის გადაწყვეტილია, ყოველ შემთხვევაში, პრესაში აქამდე ასე იწერებოდა, ამბობდნენ, რომ “ბარსა” და “ინტერი” ბოლო დეტალებს აგვარებდნენ, ახლა კი საქმეში მადრიდის “რეალი” ჩაერთო, – ავრცელებს Sky Italia.

არგენტინელმა არაერთხელ განაცხადა, რომ “ბარსაში” სურს თამაში და ლიონელ მესიც ელოდება, მაგრამ ფლორენტინო პერესთან ხუმრობა არ ღირს. ტრანსფერების ნათლიმამას, ყოველთვის შეუძლია ისეთი შეთავაზების გაკეთება, რაზეც უარს ვერ იტყვი.

“რეალს” გარკვეული უპირატესობა აქვს და უნდა ითქვას, რომ “ინტერს” მათთან მოლაპარაკლება უფრო აწყობს, რადგან, ლაუტაროს ტრანსფერში მითითებულია 111 მილიონი ევრო, რომლის გადახდაც პერესს უპრობლემოდ შეუძლია, “ბარსა” კი ივლისის შუა რიცხვებამდე ლოდინს ამჯობინებს, როცა ეს პუნქტი კონტრაქტიდან ამოვარდება და ლაუტაროს ფასს, ახალი სატრანსფერო ბაზარი დაადგენს, გამომდინარე შექმნილი მდგომარეობიდან, წინასწარ შეგვიძლია ვთქვათ, რომ მისი ფასი, გაცილებით დაბალი იქნება.

ლაუტაროს “ბარსაში” ურჩევნია, მაგრამ “ინტერს” “რეალის” შეთავაზება უფრო ხიბლავს, აი აქ იწყება ახალი საპნის ოპერა.

MD საინტერესო თეორიას ავრცელებს. “რეალის” მთავარი სამიზნე მბაპე იქნება, ცხრიანის პოზიციაზე კი ჰოლანდზე გააკეთებს აქცენტს, მაგრამ ლაუტაროს ტრანსფერზე იქამდე იაქტიურებს, სანამ “ბარსა” ნერვიულობას არ დაიწყებს და 111 მილიონ ევროს არ დახარჯავს,  – ასეთია “რეალის” ტაქტიკა. თუ “ბარსამ” მართლა გადაიხადა ლაუტაროში 111 მილიონი ევრო, კრიზისის ფონზე, სხვა ვარსკვლავის შეძენა შეუძლებელი იქნება, სხვაში კი, რა თქმა უნდა, ნეიმარი იგულისხმება.