ლუის სუარესის ეპოქა დასრულდა?

ლუის სუარესს ყოველთვის გაიხსენებენ, როგორც ერთ-ერთ ლეგენდარულ თავდამსხმელს, რომელსაც “ბარსელონაში” უთამაშია, თუმცა, უნდა ითქვას, რომ მუდმივი არაფერია და ადრე თუ გვიან, “ელ პისტოლეროს” გუნდის დატოვება მოუწევს. მიუხედავად კრიტიკისა, ლუისი ტრავმის მიღებამდე კარგ ფორმაში იმყოფებოდა. ანტუან გრიზმანის გადმობარგებამ სუარესი უფრო აქტიური გახადა – ურუგვაელმა არაერთხელ განაცხადა, რომ კონკურენტის ყოლას მიესალმება და ეცდება, რომ მას დაეხმაროს. თუმცა, დაზიანებების მიღებისა და ასაკის მატებასთან ერთად, რთული სათქმელია, მომდევნო სეზონს რამდენად კარგ კონდიციებში შეხვდება. 33 წლის შემტევი მოედნის სიღრმეში იშვიათად ჩამოდის და მეტოქეზე პრესინგს ვერ ახერხებს, მაგრამ ჯერ კიდევ მნიშვნელოვანი ფიგურაა – ის “ბარსას” სტილსა და ლეო მესის იდეალურად ერგება. ამის გათვალისწინებით, “ელ პისტოლერომ” რა რეგრესიც არ უნდა განიცადოს, “ბარსას” მაინც გამოადგება. ზაფხულში მოყვანილ გრიზმანს კატალონიურ გრანდში ადაპტაცია ჯერჯერობით უჭირს და მესისთანაც იდეალური დუეტი ვერ შექმნა, თუმცა, ზლატან იბრაჰიმოვიჩისგან განსხვავებით, შესაძლოა, შეჩვევის პროცესი სწრაფი ტემპით წარიმართოს და არგენტინელს კარგად შეეწყოს. “ბლაუგრნას” ამჟამინდელი ფორმაცია ლიონელზეა დამოკიდებული, ამიტომაც ფეხბურთელი, რომელსაც მისთვის კომფორტის შექმნა შეუძლია, გუნდის მნიშვნელოვანი წევრია. ცნობილია, რომ “ელ პისტოლერო” გასვლით მატჩებში კარგად ვერ გამოიყურება და გოლების გატანა უჭირს. მის წასვლაზე ჭორები ვრცელდება, ამიტომაც 2 ვარიანტი უნდა განვიხილოთ, რომელსაც, შესაძლოა, კიკე სეტიენმა მიმართოს. ერთ-ერთი ვარიანტი მესის “ცრუ ცხრიანად” დაბრუნებაა. გამორიცხული არაა, აღნიშნული გადაწყვეტილება “ლა პულგასთვისაც” მნიშვნელოვანი იყოს, რადგან ასაკის მატებასთან ერთად, ის საჯარიმოსთან მაქსიმალურად ახლოს იქნება, ასევე უკან ჩამოსვლა და ნახევარდაცვის დახმარება არ მოუწევს, თუმცა აქ ერთი “პრობლემა” ჩნდება – ამ ყველაფრისთვის კატალონიელთა მესვეურებმა იდეალური შუახაზის ჩამოყალიბება უნდა შეძლონ. ამის შემდეგ, არგეტინელს მხოლოდ კლასის გამოყენება და მომენტების დასრულება მოუწევს, რომლებითაც მას სწრაფი გარემარბები მოამარაგებენ, ამავდროულად კი, დაცვასაც დაეხმარებიან. .ეორე შესაძლო ვარიანტი კი – სუარესის შემცვლელის შეძენაა. როგორც მოგეხსენებათ, კლუბი ლაუტარო მარტინესის შეძენით ძალიან ინტერესდება და მის შესაძენად ყველაფერს აკეთებს. არგენტინელი მის თანამემამულეს, ლიონელ მესის მოსწონს. “ალბისელესტეში” იგი ლეოს კარგად შეეწყო და იგივე “ბარსაშიც” მოსალოდნელია. გარდა ამისა, 22 წლის თავდამსხმელის ყიდვის შემთხვევაშიც, სუარესის გაყიდვა ჯერ კიდევ არ შეიძლება, რადგან ახალ მოთამაშეს, ყველა ვარიანტში, ადაპტაციისთვის დრო დასჭირდება, ამიტომაც ურუგვაელის კიკე სეტიენის განკარგულებაში ყოფნას გარკვეული მნიშვნელობა ექნება, სანამ ლაუტარო გუნდს შეეწყობა. ორივე სცენარში ერთი საკითხი იკვეთება: “ბარსაში” დარჩენის შემთხვევაში, სუარესი ძირითადი შემადგენლობის წევრობის პრეტენზიის გამო არ უნდა წავიდეს. შემდეგი კამპანია კიკე სეტიენის გუნდითვის გადამწვეტი იქნება და თუ ლუის კვლავ სასტარტო თავდამსხმელად განიხილება, “ბარსელონამ”, შესაძლოა, სათანადო შედეგები ვერ მიიღოს. თუმცა, აუცილებლად უნდა აღინიშნოს, რომ “ელ პისტოლერო” უმაღლესი დონის ფეხბურთელია, რომელსაც გულშემატკივრებისთვის სიამოვნების მინიჭება ჯერ კიდევ შეუძლია. რას ფიქრობთ თქვენ?