“ბარსას” 4 სავარაუდო წყობა კოუტინიოს დაბრუნების შემდეგ

კიკე სეტიენმა დაადასტურა, რომ მომავალი სეზონიდან ის ბრაზილიელს საკუთარი შემადგენლობის წევრად ხედავს. ამ სტატიაში კი მოცემულია ის 4 შესაძლო წყობა, რომლებშიც კოუტინიო სათამაშო სქემას შეეწყობა.

4-3-3 (ანდრეს ინიესტას როლი)

ზოგადად, ბარსამ ფილიპე სწორედ ინიესტას შემცვლელად მოიყვანა. 27 წლის ბრაზილიელი ცენტრალურ ნახევარმცველად “კამპ-ნოუზე” გადმოსვლის დღიდან თამაშობდა, თუმცა არც ისე შთამბეჭდავად.

4-3-3 (შემტევი ნახევარმცველი)

ეს, შესაძლოა, ბრაზილიელისთვის საუკეთესო ვარიანტია. “ლივერპულსა” და “ბაიერნში” ჩატარებულ გამორჩეულ მატჩებში ის სწორედ ამ პოზიციას იკავებდა.

ამ სათამაშო სქემასთან ადაპტაცია გარკვეულ დროს წაიღებს, რადგანაც “ბარსა” შემტევი ნახევარმცველების გარეშე თამაშობს. ამ ტაქტიკაზე გადასვლა ნიშნავს, რომ სერხიო ბუსკეტსის სათამაშო როლი შემცირდება. ესპანელის თამაშის ხარისხი, კიკე სეტიენის მოსვლის დღიდან, საგრძნობლად გაუმჯობესდა.

4-3-3 (მარცხენა გარემარბი)

ეს პოზიცია საკმაოდ კონტროვერსიულია ფილიპესთვის. “ბარსელონაში” გატარებულ მეორე სეზონში მან სწორედ მარცხენა გარემარბად ითამაშა და მისი მხრიდან უღიმღამო თამაში სწორედ ამას მოჰყვა. “ბლაუგრანას” ამჟამინდელმა მწვრთნელმა მას ეს პოზიცია, შესაძლოა, კიდევ ერთხელ ანდოს.

თავის მხრივ, “ბარსელონას” უკვე იმდენი შემტევი ჰყავს შემადგენლობაში, რომ, შესაძლოა, მწვრთნელმა ბრაზილიელი მარცხენა ვინგერად აღარც განამწესოს.

4-4-2 “ბრილიანტი” (შემტევი ნახევარმცველი)

კიკე სეტიენმა, შესაძლოა, ჟორდი ალბასა და ნელსონ სემედუსთვის მთლიანი ფლანგების ჩაბარების ვარიანტი განიხილოს, რის შედეგადაც მოედნის ცენტრის მეტი ფეხბურთელით დატვირთვა შეეძლება. კოუტინიოს შეუმსუბუქდება შავი სამუშაო და წინ ორი თავდამსხმელი  ეყოლება მოსამარაგებლად, ლეო მესისა და ანტუან გრიზმანის სახით.