სუარესი “ენფილდზე” გოლის აღნიშვნას არ აპირებს

ინგლისში დაბრუნებული ურუგვაელი ფორვარდი ადგილობრივი პუბლიკისგან კეთილგანწყობას ელის.

მოგეხსენებათ, უეფას ჩემპიონთა ლიგის ნახევარფინალური ეტაპის პირველ შეხვედრაში ანგარიში სწორედ ლუის სუარესმა გახსნა. მიუხედავად “ლივერპულის” მიმართ არსებული მოგონებებისა, მათ კარში გატანილი ბურთი ურუგვაელმა საკმაოდ ემოციურად აღნიშნა.

მიუხედავად ამისა, სუარესი ფიქრობს, რომ მერსესაიდელ გულშემატკივარს მის მიერ გატანილი 82 გოლი კარგად ახსოვს და დადებითი მიღების მოლოდინშია.

“ლივერპულში” სამწელიწადნახევარი გავატარე. ვფიქრობ, ქომაგებს ჩემი იმდროინდელი თამაში არ დავიწყებიათ. მგონია, რომ უფრო მეტად აპლოდისმენტებით შემეგებებიან, ვიდრე სტვენით. ჩემი შვილი სწორედ ამ ქალაქშია დაბადებული და მისთვის პირველი სტადიონი სწორედ “ენფილდი” იყო. ეს ბევრ რამეზე მეტყველებს”, – ამბობს სუარესი.

აღსანიშნავია, რომ სამი წელია, რაც ურუგვაელს ჩემპიონთა ლიგის გასვლით შეხვედრაში არ გაუტანია. ის “წითლებს” ჰპირდება, რომ ამ ნავსის გატეხვის შემთხვევაში, ემოციებს შეიკავებს.

“ყველა, ვინც ფეხბურთში ერკვევა და ეს სპორტი უყვარს, ხვდება იმ გოლის მნიშვნელობას, რომელიც “ლივერპულთან” პირველ შეხვედრაში გავიტანე. ამ გუნდის ფანებს უდიდეს პატივს ვცემ. მათ გამო ვწუხვარ ემოციური აღნიშვნისთვის და შემიძლია დანამდვილებით ვთქვა, რომ “ენფილდზე” ასე აღნიშვნას არ ვაპირებ”, – განაცხადა ლუისმა.