ბრიან ფარინიასის დებიუტი ბარსელონაში

2026 წლის 31 ოქტომბერი ბრიან ფარინიასისთვის დაუვიწყარ თარიღად იქცა. ახალგაზრდა ფეხბურთელმა “ბარსელონას” პირველ გუნდში ოფიციალური დებიუტი შედგა. ის “ალავესთან” ლა ლიგის მატჩში ძირითად შემადგენლობაში მოხვდა და “სპოტიფაი კამპ ნოუზე” გამართულ შეხვედრაში სრულად ითამაშა. კატალონიელებმა მეტოქე ანგარიშით 6-1 დაამარცხეს.

ჰანსი ფლიკმა ფარინიასი მისთვის უჩვეულო, მარჯვენა მცველის პოზიციაზე დააყენა, რითაც ახალგაზრდა ფეხბურთელის უნივერსალურობა კიდევ ერთხელ გამოჩნდა.

ვალენსიის რეგიონიდან წარმოშობილ ფარინიასს ამ პოზიციაზე თამაშის გამოცდილება უკვე ჰქონდა. 31 ივლისს, წინასასეზონო მომზადების დროს, გერმანელმა მწვრთნელმა ის “ბირმინგემ სიტისთან” გამართულ ამხანაგურ შეხვედრაში თითქმის ნახევარი საათით ათამაშა. ის მატჩი ფრედ, 2-2 დასრულდა.

ფარინიასი სადებიუტო შეხვედრაში აქტიურობით გამოირჩეოდა. ახალგაზრდა ფეხბურთელი ხშირად ერთვებოდა შეტევებში და ტექნიკურ შესაძლებლობებსაც ავლენდა. ერთ-ერთ ეპიზოდში მან ქუსლით ეფექტური მოძრაობით მეტოქის მცველი ჩამოიშორა. ასევე, კარგი ურთიერთგაგება გამოავლინა ლამინ იამალთან.

დაცვაში ფარინიასს დიდი დატვირთვა არ ჰქონია, თუმცა მთელი 90 წუთის განმავლობაში მშვიდად და თავდაჯერებულად მოქმედებდა.

ფარინიასი “ბარსელონას” პირველი გუნდის წევრი მიმდინარე ზაფხულიდანაა. ის კლუბში 2018 წელს, 14-წლამდელთა ასაკობრივ კატეგორიაში ჩაირიცხა და მას შემდეგ “ლა მასიას” ყველა საფეხური გაიარა.

ახალგაზრდულ გუნდებში ფარინიასი უნივერსალურ ნახევარმცველად ჩამოყალიბდა. 19-წლამდელთა გუნდში გატარებულ ბოლო სეზონში მან მნიშვნელოვანი როლი შეასრულა ტრებლის მოპოვებაში. იმ სეზონში “ბარსელონას” ახალგაზრდულმა გუნდმა ჩემპიონატი, თასი და უეფას ახალგაზრდული ლიგა მოიგო.

2025/26 წლების სეზონში, ჟულიანო ბელეტის ხელმძღვანელობით, ფარინიასი “ბარსა ატლეტიკის” ერთ-ერთ წამყვან ფეხბურთელად იქცა. მან 35 მატჩში მიიღო მონაწილეობა, 5 გოლი გაიტანა და 6 საგოლე გადაცემა შეასრულა.

სარეზერვო გუნდში წარმატებული სეზონისა და ზაფხულის მოსამზადებელ პერიოდში ნაჩვენები თამაშის შემდეგ ფარინიასმა პირველ გუნდში ადგილი დაიმკვიდრა, 31 ოქტომბერს კი მისი ოფიციალური დებიუტიც შედგა.