როგორ აჯობა ბარსელონამ რეალ მადრიდს

“ერთი ქორწილიდან მეორე ქორწილი ჩნდება”, – ასე ჟღერს ესპანური ანდაზა (De una boda sale otra boda).

თუმცა, ამ ზაფხულს ერთმა ქორწილმა “მანჩესტერ სიტიდან” “ბარსელონაში” როდრის ტრანსფერი გამოიწვია. ლა ლიგის ჩემპიონებმა დასძლიეს “რეალ მადრიდის” კონკურენცია და დაასრულეს ტრანსფერი, რომლის ღირებულებამაც ბონუსების ჩათვლით შესაძლოა 76.5 მილიონ ევროს მიაღწიოს.

ივლისის ბოლოს როდრი კოსტა-ბრავაზე ისვენებდა. ახლახან მოგებული მსოფლიო ჩემპიონატისა და ტურნირის საუკეთესო მოთამაშის ჯილდოს შემდეგ, 30 წლის ესპანეთის ნაკრების კაპიტანი თავისი ძველი მეგობრის, დანი კოდინას ქორწილს დაესწრო.

კოდინა “ბარსელონას” ოპერაციებისა და მოთამაშეთა მომსახურების ხელმძღვანელია, რომელმაც ეს თანამდებობა 2025 წელს დაიკავა. ის მსგავს პოზიციაზე “მანჩესტერ სიტიშიც” მუშაობდა, სადაც როდრის შეხვდა და დაუახლოვდა. პეპ გვარდიოლას სამწვრთნელო შტაბის რამდენიმე წევრი ასევე ესწრებოდა ესპანეთის ჩრდილო-აღმოსავლეთში გამართულ ქორწილს.

როდრი ცერემონიამდე საკმაო დროით ადრე ჩავიდა, რათა რამდენიმე დღე დაესვენა კატალონიის ერთ-ერთ ყველაზე თვალწარმტაც და მიმზიდველ ადგილას, რომელიც ბარსელონადან სანაპიროს გასწვრივ, ორსაათიანი სავალის დაშორებით მდებარეობს.

საიდუმლო სადილი ბეგურში

ერთ-ერთ ასეთ დღეს მას გარკვეული საქმე ჰქონდა მოსაგვარებელი და ამისთვის დახმარება დასჭირდა. მას ძალიან კონკრეტული თხოვნა ჰქონდა: ეძებდა იზოლირებულ ადგილს, რათა ვიღაცას სადილზე შეხვედროდა და ხაზგასმით აღნიშნა, რომ აუცილებლად შეუმჩნეველი უნდა დარჩენილიყო.

როდრის ბეგურში მდებარე რესტორანი Can Pitu ურჩიეს – ტრადიციული ადგილი რეგიონის ერთ-ერთ ხალხმრავალ ქალაქში. ბეგური სავსეა მაღაზიებითა და რესტორნებით, მაგრამ Can Pitu რადარების მიღმაა. ძველი სტილის, შეუმჩნეველი და ტურისტული ქუჩებიდან მოშორებული ეს ადგილი ძირითადად ადგილობრივებისთვისაა ცნობილი, რომლებმაც იციან მთავარი: საჭმელი იქ შესანიშნავია.

როდრი რესტორანში ჯავშნის გარეშე შევიდა და მაგიდა ითხოვა. რამდენიმე წუთში იქ “ბარსელონას” სპორტული დირექტორი დეკუ გამოჩნდა. ადგილზე არავის აუტეხავს აჟიოტაჟი და არც ფოტოს გადაღება უთხოვიათ.

მათი ერთად გადაღებული ფოტოები დიდ სენსაციას გამოიწვევდა. იმ მომენტში ჩანდა, რომ როდრი “მანჩესტერ სიტის” დატოვებას და “რეალ მადრიდში” გადასვლას აპირებდა. ევროპის 15-გზის ჩემპიონთან დაახლოებული წყაროები – რომლებიც, ისევე როგორც ყველა აქ მოყვანილი წყარო, ურთიერთობების შესანარჩუნებლად ანონიმურად საუბრობდნენ – დარწმუნებულნი ჩანდნენ, რომ შეთანხმება მიღწეული იქნებოდა.

25 ივლისს, კოდინას ქორწილში, სტუმრებს შორის გავრცელდა ჭორი, რომ როდრიმ გადაიფიქრა და “ბარსელონაში” გადასვლა სურდა. წვეულებაზე მისი “ბარსელონას” სიმღერებზე ცეკვისა და სიმღერის ვიდეოკადრები სოციალურ ქსელებში რამდენიმე კვირის შემდეგ გავრცელდა.

დეკუს სტრატეგია და “რეალ მადრიდის” რეაქცია

კოსტა-ბრავაზე თითქოს “ბარსელონას” მიერ ტრანსფერის ჩაჭრის შანსები იზრდებოდა, მაგრამ “კამპ ნოუზე” გადასვლამდე ჯერ კიდევ მნიშვნელოვანი ნაბიჯები იყო გადასადგმელი. “ბერნაბეუდან” წამოსული გზავნილები კვლავ თავდაჯერებული იყო. ზოგიერთი წყარო მის მადრიდში გადაბარგებას გადაწყვეტილ ამბადაც კი მიიჩნევდა, მიუხედავად იმისა, რომ “რეალ მადრიდს” “მანჩესტერ სიტისთან” კონტაქტი არ ჰქონდა დამყარებული.

ამ ფონზე კი როდრის გარემოცვასა და “ბარსელონას” შორის მოლაპარაკებები გრძელდებოდა. 5 აგვისტოს დეკუ კიდევ ერთი საკვანძო შეხვედრისთვის გაემგზავრა, ამჯერად მადრიდში.

მეორე დღეს The Athletic-მა გაავრცელა ინფორმაცია, რომ “ბარსელონა” იკვლევდა როდრის დამატების შესაძლებლობას, რომელიც თავად კატალონიელებს ანიჭებდა უპირატესობას.

“რეალ მადრიდში” ეს სიახლე ახალი მწვრთნელის, ჟოზე მოურინიოს ხელმძღვანელობით გუნდის აღმშენებლობის გეგმებისთვის მძიმე დარტყმა აღმოჩნდა. იმავე დღეს მათ “ლაიფციგიდან” იან დიომანდეს 140 მილიონ ევრომდე ღირებულების ტრანსფერი გამოაცხადეს. სოციალურ ქსელებში უამრავი გულშემატკივარი კრიტიკით შეხვდა კლუბს როდრის ხელიდან გაშვების გამო.

“ბარსელონა” კვლავ უკიდურესი სიფრთხილით მოქმედებდა. დეკუს სატრანსფერო სტრატეგია ყველაფრის მაქსიმალურად გასაიდუმლოებაა. უმეტეს სატრანსფერო ოპერაციებში, მხოლოდ ძალიან მცირე რაოდენობის ადამიანმა იცის მისი ოფისიდან გამოსული სიახლეების შესახებ.

როდრის შემთხვევაში დეკუსა და “ბარსელონას” ხელმძღვანელობას განსაკუთრებული სიფრთხილის გამოჩენა სურდათ. მათ უკვე მიიღეს მკაცრი გაკვეთილი ამ ზაფხულს ბერნარდუ სილვას ტრანსფერის მცდელობიდან.

კლუბი ბერნარდუსა და მის წარმომადგენლებს დაუკავშირდა, რათა მისი, როგორც თავისუფალი აგენტის ტრანსფერი განეხილათ მას შემდეგ, რაც მას “მანჩესტერ სიტისთან” კონტრაქტი ამოეწურა. მათ ეგონათ, რომ სიტყვიერ შეთანხმებას მიაღწიეს.

თუმცა, ბერნარდუმ შეთავაზებების მოსმენა განაგრძო, “რეალ მადრიდმა” კი თავისი შანსი გამოიყენა და პორტუგალიელი ნახევარმცველი თავისთან გადასვლაში დაარწმუნა. ამიტომ, “ბარსელონას” სურდა დარწმუნებულიყო, რომ როდრი სრულად თანახმა იყო, სანამ “მანჩესტერ სიტისთან” მოლაპარაკებებს დაიწყებდა.

რატომ აირჩია როდრიმ “ბარსელონა”?

სიტუაციასთან დაახლოებული წყაროები აცხადებენ, რომ როდრის გადაწყვეტილება, “რეალ მადრიდის” ნაცვლად “ბარსელონა” აერჩია, ძირითადად მათი თამაშის სტილით იყო განპირობებული. ის ელის, რომ ეს სტილი მის თამაშს უკეთ მოერგება და მსგავსია იმისა, რასაც ის “მანჩესტერ სიტისა” და ესპანეთის ნაკრებშია მიჩვეული.

დეკუს სვლებისა და საიდუმლო სადილების მიღმა, მთავარი მწვრთნელი ჰანსი ფლიკიც არაერთხელ ესაუბრა როდრის. ფლიკს ძალიან უნდოდა როდრის გამოცდილებისა და ლიდერული თვისებების დამატება თავისი ნიჭიერი, მაგრამ ახალგაზრდული გუნდისთვის, რომელმაც ზედიზედ მოიგო ლა ლიგის ტიტულები.

თუმცა, “ბარსელონას” იმ რვა ესპანელ ფეხბურთელს, რომლებიც როდრისთან ერთად იმყოფებოდნენ მსოფლიო ჩემპიონატზე, მის დარწმუნებაში მნიშვნელოვანი როლი არ უთამაშიათ.

ამის საპირისპიროდ, როდესაც მადრიდში “ბარსელონას” გააქტიურების შესახებ შეშფოთება გაჩნდა, კლუბის ხელმძღვანელებმა სთხოვეს თავიანთ მოთამაშეებსა და როდრისთან კავშირში მყოფ სხვა პირებს, დაკავშირებოდნენ მას და დარწმუნებულიყვნენ, რომ ის კვლავ თანახმა იყო მათ შეთავაზებაზე. ამ მცდელობების მიუხედავად, ჩანდა, რომ მას გადაწყვეტილება უკვე მიღებული ჰქონდა.

მადრიდის ხედვა და მსოფლიო ჩემპიონატის გავლენა

“რეალ მადრიდს” მიაჩნია, რომ როდრის კარგი შეთავაზება გაუკეთეს, როგორც საფეხბურთო, ისე ფინანსური თვალსაზრისით. ასევე სიმართლეა ისიც, რომ მსოფლიო ჩემპიონატამდე “რეალ მადრიდი” მის დამატებას არ განიხილავდა.

იყო ეჭვები მის ფიზიკურ მდგომარეობასა და ასაკთან დაკავშირებით, ახალი კონტრაქტი იყო შეთანხმებული საყრდენ ნახევარმცველ ორელიენ ჩუამენისთან, გარდა ამისა, როდრის სახელი ივნისის საპრეზიდენტო არჩევნებში ფლორენტინო პერესის ოპოზიციონერ კანდიდატთან, ენრიკე რიკელმესთან იყო დაკავშირებული.

მაგრამ მსოფლიო ჩემპიონატმა ყველაფერი შეცვალა. მართალია მადრიდულმა წყაროებმა პატივი სცეს მის გადაწყვეტილებას აერჩია “ბარსელონა”, მაგრამ ესპანეთის ნაკრებში მისმა თამაშმა თვალნათლივ აჩვენა, თუ რამდენად დომინანტური შეუძლია იყოს იმ პოზიციაზე, რომლის შევსებაც “რეალ მადრიდს” 2024 წელს ტონი კროოსისა და 2025 წელს ლუკა მოდრიჩის წასვლის შემდეგ უჭირს.

“ბარსელონაში” კი როდრის ტრანსფერს გუნდის მნიშვნელოვნად გაუმჯობესების უნიკალურ შესაძლებლობად განიხილავენ.

წინა მწვრთნელმა ჩავიმ თითქმის მთელი სეზონი დახარჯა სერხიო ბუსკეტსის მემკვიდრის ძიებაში (რომელმაც გუნდი 2022-23 წლების სეზონის შემდეგ დატოვა), სანამ საბოლოოდ უმისოდ თამაშს მოერგებოდა.

როდესაც ფლიკი ჩავის შემცვლელად მოვიდა, მარკ კასადომ 2024-25 წლების სეზონის საწყის ეტაპზე კარგად ითამაშა, ხოლო ახლა 19 წლის მარკ ბერნალი ბრწყინვალე პერსპექტივად იქცა. ერიკ გარსიამაც ოსტატურად ითამაშა საყრდენი ნახევარმცველის პოზიციაზე და “ბარსელონამ” გერმანელი მწვრთნელის ხელმძღვანელობით საბოლოოდ იხილა საუკეთესო ფრენკი დე იონგი.

დე იონგის ფიზიკური მდგომარეობა როდრის ტრანსფერზე ფიქრის ერთ-ერთი ფაქტორი იყო. 29 წლის ნიდერლანდელი ივლისში მსოფლიო ჩემპიონატიდან მარჯვენა მუხლის მედიალური კოლატერალური იოგის გაწყვეტით დაბრუნდა და “ბარსელონამ” მისი გამოჯანმრთელების სავარაუდო დროდ ოთხი თვე დაასახელა.

მოლაპარაკებები და საბოლოო შეთანხმება

“ბარსელონას” პირველი წინადადება როდრის თაობაზე დაახლოებით 45 მილიონ ევროსა და ბონუსებს მოიცავდა. “მანჩესტერ სიტი” ფეხბურთელს დაახლოებით 80 მილიონად აფასებდა და “ბარსელონას” საწყისი წინადადება სერიოზულად არ მიუღია.

“მანჩესტერ სიტიმ” როდრისთან კონტრაქტის გახანგრძლივება არაერთხელ სცადა, მაგრამ როდესაც ეს მცდელობები უარით დასრულდა, “ქალაქელები” ნახევარმცველის გაყიდვაზე დათანხმდნენ, რადგან მას კლუბთან კონტრაქტი 2027 წლის ივნისამდე აკავშირებდა.

გარიგების დეტალების მცოდნე წყაროებმა განაცხადეს, რომ მოლაპარაკებების დაწყებამდე კვირებით ადრე მათთვის ნათელი იყო, რომ როდრის არჩევანი “ბარსელონა” იყო და არა “რეალ მადრიდი”. ამასთან, “მანჩესტერ სიტის” მხრიდან იყო უპირატესობა “რეალ მადრიდთან” მოლაპარაკებებზე, რადგან მათთან შეთანხმება უფრო მარტივად მიაჩნდათ, ვიდრე “ბარსელონასთან”.

“ბარსელონა”, რომელიც მუდმივად აცხადებდა, რომ ფინანსურად მზად იყო ამ ზაფხულს დიდი ტრანსფერების განსახორციელებლად, აგრძელებდა ზეწოლას და პირობების გაუმჯობესებას. მეორე წინადადებამ თანხა 60 მილიონ ევრომდე გაზარდა, მაგრამ ესეც უარყვეს, რადგან “მანჩესტერ სიტი” მეტს ითხოვდა.

“ბარსელონას” საწყისი შეთავაზებიდან ცხრა დღის შემდეგ, საბოლოოდ მოხდა გარღვევა და პრინციპული შეთანხმება შედგა 76.5 მილიონ ევრომდე ღირებულების ტრანსფერზე, საიდანაც 60 მილიონი ევრო ფიქსირებული თანხა იქნება, დარჩენილი კი ბონუსები.

ორშაბათს საღამოს როდრი ბარსელონაში ჩავიდა და აეროპორტის გარეთ შეკრებილ ჟურნალისტებს მიმართა:

“ეს იყო დაძაბული რამდენიმე დღე, მოხარული ვარ, რომ ყველაფერი მოგვარდა. ძალიან ბედნიერი ვარ აქ ყოფნით. ‘ბარსელონაში’ თამაში ჩემთვის ოცნებაა. ძალიან აღელვებული ვარ იმ თანაგუნდელებთან შეერთებით, რომელთა უმეტესობასაც უკვე ვიცნობ. ახლა კი მუშაობის დაწყების დროა.”

სტატიის ორიგინალი მომზადებულია The Athletic-ის ჟურნალისტის, პოლ ბალიუსის მიერ.