ვოიჩეხ შჩესნი: ძველი ტრავმის გამო ყოველი სეივის შემდეგ ტკივილს ვგრძნობ

“ბარსელონას” პოლონელმა მეკარემ, ვოიჩეხ შჩესნიმ საფეხბურთო სამყაროს გაუმხილა იმ ფიზიკური ტანჯვის შესახებ, რომელიც კარიერის განმავლობაში მას შემდეგ თან სდევს, რაც ათწლეულზე მეტი ხნის წინ “არსენალში” ყოფნისას მძიმე დაზიანება მიიღო. გამოცდილი კარის დარაჯი აღიარებს, რომ ყოველი მოგერიებული ბურთი მისთვის დიდ ტკივილთან ასოცირდება – ეს ის რეალობაა, რის გამოც კატალონიური კლუბისგან შემოთავაზების მიღებამდე მან კარიერის დასრულებაც კი გადაწყვიტა.

2008 წლის მოტეხილობის მძიმე შედეგები

მიუხედავად იმისა, რომ შჩესნის ტრანსფერი “ბარსელონაში” დიდებულ დაბრუნებად შეფასდა, პოლონელმა ახლა საზოგადოებას თავისი კარიერის სასტიკი ფიზიკური რეალობა დაანახვა. 2008 წელს, ჩრდილოეთ ლონდონში, ერთ-ერთი ვარჯიშის დროს, მან ორივე ხელი მოიტეხა. ამ ტრავმის შედეგები მას “რომაში”, “იუვენტუსსა” და ახლა უკვე “სპოტიფაი კამპ ნოუზეც” თან სდევს. სწორედ ეს ქრონიკული ტკივილი გახდა მისი თავდაპირველი გადაწყვეტილების მთავარი მიზეზი, რომ ევრო 2024-ის შემდეგ ფეხბურთიდან წასულიყო, ვინაიდან ყოველდღიური პროფესიონალური დატვირთვა გაუსაძლისი ხდებოდა.

ბურთის დაჭერა ტკივილით

თავის ყოფილ თანაგუნდელთან, გჟეგოჟ კრიხოვიაკთან YouTube არხზე საუბრისას, ვეტერანმა გოლკიპერმა განმარტა, თუ რამხელა დისკომფორტს განიცდის თითოეულ მატჩსა და ჰანსი ფლიკის ხელმძღვანელობით ჩატარებულ საწვრთნელ პროცესში:

“უბრალოდ არ შემიძლია ბურთის დაჭერა ისე, რომ ტკივილი არ ვიგრძნო. არ ყოფილა არცერთი დარტყმა, რომელიც ისე მოვიგერიე, რომ არაფერი მეგრძნო. უბრალოდ, ამ ტკივილს შევეჩვიე, თუმცა ეს ძალიან უსიამოვნო შეგრძნებაა.”

პრობლემები საფეხბურთო მოედნის მიღმაც

ტკივილი მსაჯის საფინალო სასტვენთან ერთად არ სრულდება. შჩესნიმ განმარტა, რომ ხელებში არსებული ანთებითი პროცესები და დაღლილობა მის პირად ცხოვრებაზეც ახდენს გავლენას და მოედანზე გატარებული ინტენსიური დღის შემდეგ, მარტივი საყოფაცხოვრებო საქმეების შესრულებასაც კი თითქმის შეუძლებელს ხდის:

“ზოგჯერ მეკარის ხელთათმანის გახდაც კი არ შემიძლია, რადგან წებოვან ლენტს დამოუკიდებლად ვერ ვხსნი და დახმარებას ვითხოვ. არ შემიძლია წყლის ბოთლის დაჭერა ისე, რომ არ გამივარდეს, ან თავსახურის მოხსნა. ამ ყველაფრისგან აზრზე მოსასვლელად ჩვეულებრივ ერთი საათი მჭირდება.”

ბავშვობის ტრავმის თავიდან არიდება

ფიზიკური ნაწიბურების გარდა, შჩესნიმ მამასთან, მაცეი შჩესნისთან (რომელიც თავადაც პროფესიონალი მეკარე იყო) არსებულ რთულ ემოციურ ურთიერთობაზეც ისაუბრა. “ბარსელონას” კარის დარაჯმა აღიარა, რომ მისი ბავშვობა შიშთან იყო დაკავშირებული, როდესაც მამამისი სახლში ბრუნდებოდა:

“ძალიან პატარა ასაკიდანვე ჩვენს შორის ისეთი ურთიერთობა იყო, რომ მამაჩემის მეშინოდა. არასდროს მქონია ის განცდა, რომ მეფიქრა: ‘ოჰ, მამა მოდის’. უფრო ასეთი რეაქცია მქონდა: ‘ჯანდაბა, მამა მოდის’, რადგან არასდროს იცოდი, რა განწყობაზე იქნებოდა, როცა მოვიდოდა.”

ამ მწარემ გამოცდილებამ სრულად შეცვალა ვოიჩეხის მიდგომა მამობისადმი, რაზეც მან ინტერვიუ ასე დაასრულა:

“საკუთარ თავს შევპირდი, რომ არასდროს ვუზამდი ჩემს შვილს ისეთ რამეს, რომ მას სახლში ჩემი დაბრუნების შეშინებოდა.”