ბარსელონამ 2026/27 წლების სეზონის ახალი ფორმა წარადგინა

“ბარსელონამ” 2026/27 წლების სეზონის ახალი საშინაო ფორმა ოფიციალურად წარადგინა. ღონისძიება ბარსელონას თანამედროვე ხელოვნების მუზეუმში (MACBA) გაიმართა და უნიკალური შოუს თანხლებით ჩაიარა. პრეზენტაციის მთავარი სლოგანი გახლდათ: “ლურჯ-ბროწეულისფერი გულისცემა. ვნებები, რომლებიც გვამოძრავებს”.

პრეზენტაციის კონცეფცია და ღონისძიება

ლურჯ-ბროწეულისფერი გულისცემა – ეს არის ენერგია, რომელიც თითოეულ თამაშს, ტრიბუნებიდან წამოსულ ყოველ შეძახილსა და ამ ფერების მატარებელ თითოეულ თაობას ამოძრავებს. ეს ვნება ლოკალურ შედეგებს სცდება; ის აერთიანებს ფეხბურთელებსა და გულშემატკივრებს, ამოძრავებს კლუბს და თაობიდან თაობას გადაეცემა. შოუ თანამედროვე ცეკვას, ცოცხალ მუსიკასა და აუდიოვიზუალურ ელემენტებს აერთიანებდა, რათა მატჩის დღის ემოციები – დაწყებული თამაშისწინა მღელვარებით და დასრულებული საფინალო სასტვენის შემდგომი სიხარულით – ხელოვნების ენით გადმოეცა.

ღონისძიებას კულტურის, სპორტისა და გართობის სფეროს გამოჩენილი ფიგურები, კონტენტ კრეატორები და სპონსორები ესწრებოდნენ. კლუბს წარმოადგენდნენ პრეზიდენტი რაფაელ იუსტე, ვიცე-პრეზიდენტი და მდივანი ჟოზეპ კუბელსი, ასევე დირექტორთა საბჭოს სხვა წევრები.

• ფორმა შექმნილია კლუბის მთავარ პარტნიორთან, Nike-სთან თანამშრომლობით და უკვე ხელმისაწვდომია გასაყიდად.
• მაისური დამზადებულია Dri-FIT ADV ტექნოლოგიით, რაც აუმჯობესებს ჰაერის ცირკულაციას და სპორტსმენებს მაქსიმალურ კომფორტს ანიჭებს.
• ფორმის მარცხენა მკლავზე განთავსებულია Midea-ს ლოგო (საყოფაცხოვრებო ტექნიკის მწარმოებელი კომპანია), რომელიც 1 ივლისიდან კლუბის ახალი პარტნიორი გახდა.

ახალი შრიფტი — FC Barcelona Modernista

2026/27 წლების სეზონში პირველი გუნდის ფორმაზე გამოყენებული იქნება სრულიად ახალი შრიფტი სახელწოდებით FC Barcelona Modernista, რომელიც ექსკლუზიურად კლუბისთვის შეიქმნა. ის კატალონიური მოდერნიზმითაა შთაგონებული და სპორტულ სივრცეში შემოაქვს ისეთი ფასეულობები, როგორიცაა კრეატიულობა, ინოვაცია, უნიკალურობა და კულტურული სიამაყე.

ეს შრიფტი მხოლოდ ლურჯ-ბროწეულისფერთა პირველი გუნდისთვის იქნება გამოყენებული (სახელებისა და ნომრებისთვის). კატალონიელები მას უეფას ჩემპიონთა ლიგის, კოპა დელ რეისა და ესპანეთის სუპერ თასის მატჩებში გამოიყენებენ, ხოლო ლა ლიგაში – ტურნირის ოფიციალური შრიფტით ითამაშებენ. აღნიშნულ შრიფტს კლუბის ახალგაზრდული და სხვა სპორტული სექციებიც მოირგებენ.

“ბარსელონას” ფონდი მაისურის ზურგზე

მომავალი სეზონიდან, მამაკაცთა და ქალთა პირველი გუნდების მაისურების ზურგზე ყველა ტურნირზე “ბარსელონას” ფონდის ლოგო იქნება გამოსახული. ეს ინიციატივა სოციალური მიზნებისადმი კლუბის ისტორიული ვალდებულების დასტურია. ფონდი ძირითადად ორიენტირებულია:

• ახალგაზრდების ფსიქიკურ ჯანმრთელობაზე;
• მოწყვლადი ბავშვების დაცვასა და განათლების ხელმისაწვდომობაზე;
• სოციალურ ინკლუზიასა და კლიმატური კრიზისის წინააღმდეგ ბრძოლაზე.

ეს ნაბიჯი მსოფლიოს წინაშე კიდევ ერთხელ უსვამს ხაზს და ამართლებს დევიზს — “მეტი, ვიდრე კლუბი”. ფონდის პროექტებით უკვე ისარგებლა 500,000-ზე მეტმა ბავშვმა 23 სხვადასხვა ქვეყანაში, რისთვისაც 8 მილიონ ევროზე მეტი დაიხარჯა. ფონდი იქცევა იმედისა და ტრანსფორმაციის მთავარ გზავნილად, რომელიც მსოფლიოს მასშტაბით მილიონობით გულშემატკივრამდე მიაღწევს.