“კამპ ნოუ” გრიზმანს ელოდება

ხვალ, 6 აპრილს, ლა ლიგის ფინალის ტოლფასი შეხვედრა გაიმართება – “ბარსელონა” “ატლეტიკოს” უმასპინძლებს.

დაპირისპირებას ინტერესს ისიც მატებს, რომ მოედანზე დიდი ალბათობით ანტუან გრიზმანიც იქნება, რომელმაც გასულ ზაფხულს “ბარსელონაში” გადასვლაზე უარი განაცხადა. თუმცა მთავარი ისაა, თუ როგორ გააკეთა მან ეს. ფრანგმა მის გადაწყვეტილებაზე ფილმი გადაიღო “The Decision”. ამით კი კლუბი შეურაცხყოფილი დარჩა.

ფრანგს შეეძლო “კამპ ნოუს” გმირი გამხდარიყო, მაგრამ, ამის მაგივრად, ის მოედანზე მტრის სტატუსით ითამაშებს.

ყველაზე საინტერესო კი ისაა, რომ ფანებს გაბრაზებამ ჯერ კიდევ არ გადაუარათ. რამდენიმე კვირის წინ, L’Equipe-მა გამოკითხვა ჩაატარა, რომლითაც გაირკვა, რომ “ბარსელონას” გულშემატკივრებს იმის გაგონებაც კი არ უნდათ, რომ გრიზმანი კატალონიურ კლუბში შესაძლოა მომავალ ზაფხულს გადავიდეს.