ჟოზეპ მარია ბართომეუს მიმართვა ჟოან ლაპორტას

ძვირფასო პრეზიდენტო,

თქვენი და თქვენი დირექტორთა საბჭოს წევრების მიერ ბოლო პერიოდში გაკეთებული განცხადებების შემდეგ თავს ვალდებულად ვთვლი, მოგმართოთ, რათა გარკვეული განცხადებები გადაიხედოს, პასუხისმგებლობები დაზუსტდეს და როგორც პრეზიდენტს, მოგთხოვოთ რეაგირება იმ სიტუაციებზე, რაც მნიშვნელოვან ზიანს აყენებს არა მხოლოდ კლუბს, არამედ იმ ბორდსაც, რომლის მეთაურობის პატივიც თითქმის 7 წლის განმავლობაში მქონდა. 

20 ივნისს გამართულ გენერალურ ასამბლეას იმ ანგარიშების დამტკიცება სთხოვეთ, რომელიც 2019/20 ფინანსურ წელს ჩვენი დირექტორთა საბჭოს მიერ იყო ფორმულირებული. ეს აუდიტი ითვალისწინებს სანდრო როსელის ხელმძღვანელობით დაწყებულ 2010-დან 2020 წლამდე პერიოდის მანდატის ფინანსურ შედეგს, რაც 193 მილიონი ევროს ოდენობით დადებით ბალანსს გულისხმობდა იმ ზარალის გამოკლებით, რომელიც კლუბს პანდემიის გამო მიადგა და რომელიც, კანონის მიხედვით, აღნიშნულ ანგარიშში არ ითვლება. 

2003-10 წლების მანდატის შედეგი 47.6 მილიონი ევროს უარყოფითი ბალანსი იყო. ჩვენმა გუნდმა თქვენგან კატასტროფული მემკვიდრეობა მიიღო. შესაბამისად, აუცილებელი იყო, დანაკარგის შესავსებად სამართლებრივი მოქმედება დაწყებულიყო და ეს მხოლოდ ჩვენი სურვილის გამო არ მომხდარა. ეს ფაქტი თქვენი მხრიდან არასწორად განიმარტა. 

2020 წლის 14 მარტიდან კლუბის შემოსავალმა მოულოდნელი და სწრაფი ვარდნა დაიწყო, რამაც საგანგაშო მდგომარეობაში შესვლა გამოიწვია. საპასუხოდ, ჩვენმა ბორდმა კლუბის ყველა ფეხბურთელის, მწვრთნელისა და სხვა სპორტული მუშაკის ანაზღაურების 12%-ით შემცირება დაამტკიცა, რაც მდგომარეობის შემსუბუქებას ემსახურებოდა. 

2020 წლის ზაფხულის ბოლოს მივაღწიეთ შეთანხმებას, რომ იგივე პირებისთვის ხელფასი “კამპ ნოუზე” გულშემატკივრების დაბრუნებისა და ბარსელონაში ტურიზმის აღდგენის შესაბამისად ყოფილიყო გადახდილი. ამ გეგმის თანახმად, თუ აღდგენა 2021 წლის ივნისამდე ვერ მოხდებოდა, ხელფასები დამატებით 20%-ით უნდა შემცირებულიყო (რაც დაახლოებით 90 მილიონ ევროს შეადგენს). 

ეს სისრულეში ახალ ხელმძღვანელობას უნდა მოეყვანა, თუმცა თქვენი მხრიდან არანაირი მოქმედება არ არის. 

2020 წლის აპრილში დავიწყეთ კორპორაციული პროექტი, რომელიც სტრატეგიული პარტნიორების 49%-იანი ჩართულობით იმ სფეროებში, რომლებიც სპორტულ შემოსავალთან პირდაპირ კავშირში არ არის, კლუბს დამატებით ფინანსურ მოგებას მოუტანდა. პროექტი 4 მიმართულებას მოიცავდა: 

Barça Licensing and Merchandising: სავაჭრო ქსელების კავშირი, რომელიც “ბარსელონას” ოფიციალური პროდუქციის ლიცენზირებას განკარგავდა;
Barça Studios: მსოფლიო მნიშვნელობის ციფრული განვითარების ცენტრი, რომელიც აუდიო და ვიზუალურ მასალას აწარმოებს; 
Barça Innovation Hub: პლატფორმა, რომელიც ხელს უწყობს ტექნოლოგიური და სამეცნიერო კვლევის შედეგების სპორტში დანერგვას;
Barça Academy: 50 სასწავლო ცენტრი მსოფლიოს სხვადასხვა წერტილში. 

4 დაინტერესებულ კომპანიასთან შეთანხმება უკვე მიღწეული გვქონდა, თქვენი დირექტორთა საბჭოს თანხმობის შემთხვევაში კი კლუბი მიიღებდა სულ მცირე, 220 მილიონიან მოგებას, რაც, სრული სეზონის განმავლობაში, შესაძლოა, 375 მილიონამდე გაზრდილიყო. 220 მილიონი საკმარისი იქნებოდა იმისთვის, რომ “ბარსელონას” ფეხბურთელების დარეგისტრირების პრობლემა არ შექმნოდა. 

ამასთან ერთად, CVC-სთან შეთანხმების შემთხვევაში კორონავირუსით გამოწვეული ფინანსური ზიანი ფაქტობრივად განულებული იქნებოდა. 

ამჟამინდელი დირექტორთა საბჭოს უმოქმედობა იმის გათვალისწინებით, რომ მათ კლუბის ფინანსურ მდგომარეობაზე ზუსტი წარმოდგენა აქვთ, გასაკვირია. ისინი ზუსტ ანგარიშებს არჩევნების მოგებამდე დიდი ხნით ადრე ფლობდნენ. 

გასაკვირია ჟოან ლაპორტას გადაწყვეტილებაც, რომელმაც კლუბის ყოფილ ფეხბურთელს, ნეიმარს, 16.5 მილიონი ევრო არ აანაზღაურებინა. იყო მოლოდინი, რომ სასამართლო საბოლოოდ “ბარსელონასთვის” სასარგებლო გადაწყვეტილებას მიიღებდა, თქვენ კი კლუბის ინტერესების საწინააღმდეგოდ იმოქმედეთ. 

დაანონსებული 487 მილიონიანი ზარალი გასაკვირია იმის ფონზე, რომ შემოსავალი 375 მილიონით შემცირდა. ეს დეტალები ყველა პარტნიორისთვის უნდა იყოს ახსნილი. 

გთხოვთ, რომ თქვენს მიერ ჩატარებული აუდიტის ყველა შედეგი და დეტალური აღწერა გაასაჯაროვოთ, რათა თავიდან ავიცილოთ სპეკულაცია და ეჭვები “სავარაუდო კრიმინალურ” მოქმედებებთან დაკავშირებით. 

თუ ასეთი გადაცდომები ნაპოვნი იქნება, პირობას გაძლევთ, რომ პირველი ვიქნები, ვინც მათ სამართლებრივ დონეზე გადაწყვეტს. ამასთან დაკავშირებით ჩემი პოზიცია იგივეა, რაც ყოველთვის იყო: კლუბის ხელმძღვანელობა კლუბის წევრებს მაქსიმალურ გამჭვირვალობას უნდა სთავაზობდეს.