მესი: “ბარსელონა ჩემი სახლია”

გასული წლის საუკეთესო ბომბარდირი ლეო მესი “ოქროს ბუცით” დააჯილდოვეს. ცერემონიის დასრულების შემდეგ, ლეომ ორგანიზატორებისა და ჟურნალისტების კითხვებს პასუხი გასცა.

–კიდევ ერთი სეზონი, სადაც “ბარსას” მთავარი მოწინააღმდეგე მადრიდის “რეალი” იქნება.

– მადრიდელთა დადარაჯებას გვირჩევნია საკუთარ თამაშს მივხედოთ.

– შარშან 34 გოლი გაიტანეთ. არის თუ არა შესაძლებელი წელსაც იმავე შედეგის განმეორება, ან გაუმჯობესება?

– კარგი კი იქნებოდა, მაგრამ ძალიან რთულია. არც კი ვიცი ოდესმე თუ შევძლებ ისევ ამ ჯილდოს მოგებას. მთავარი სირთულე იმაში მდგომარეობს, რომ სეზონია ძალიან გრძელი.

– რომელია თქვენი საყვარელი პოზიცია მოედანზე?

– არც კი ვიცი. თითქმის ყველგან კარგად ვგრძნობ თავს, სადაც მწვრთნელი მიმითითებს. ამავდროულად გააჩნია მოწინააღმდეგესაც, თუ ვის ვეთამაშებით. ბოლო რამდენიმე წელია ვატყობ, რომ საგრძნობლად მოვუმატე და ამიტომაც მნიშვნელობა არააქვს თუ რომელ პოზიციაზე მომიწევს გარჯა.

– მიუხედავად ასაკისა, შენ უკვე თითქმის ყველაფერს მიაღწიე

– ეს ჯერ არაფერია. კიდე მსურს მოვიგო იმდენი, რამდენიც აქამდე მოვიგე და უფრო მეტი. რათქმა უნდა არგენტინის ნაკრებთან ერთად ტიტულების მოგება არის ჩემი ერთ–ერთ ოცნება.

– რას ნიშნავს თქვენთვის “ბარსელონაში” თამაში?

– ეს ჩემი სახლია. ძალიან ბედნიერი ვარ აქ. 13 წლის ვიყავი, როცა ბარსელონაში გადმოვედი საცხოვრებლად და ეხლაც იქ ვარ სადაც მსურს.

– რითი დაგამახსოვრათ თავი ფრენკ რაიკარდმა?

– ფრენკთან შეხვედრა და მუშაობა ჩემთვის უმნიშვნელოვანესი იყო. მას სწამდა ჩემი და ბოლომდე მენდობოდა, რამაც ძალიან დიდი როლი ითამაშა ჩემს კარიერულ წინსვლაში. რაიკარდის მადლიერი ვარ, მას ესმის ეს სფერო, ბევრს მუშაობს და წარმატებასაც აღწევს.

– რა შეიცვალა გუარდიოლას მოსვლის შემდეგ?

– ჩვენ ორი სეზონი ჩავაგდეთ. გასახდელში ყველანი დათრგუნული და დაძაბული ვიყავით სულ, არაფერი გამოგვდიოდა, პეპმა კი შეგვმატა ის, რაც ასე გვესაჭიროვებოდა, მოტივაცია და სულისკვეთება.

– რატომ განსხვავდება “ბარსას” მესი არგენტინის მესისგან?

– “ბარსელონაში” ძალიან დიდი ხანია ვთამაშობ. გუნდელებს ძალიან კარგად ვიცნობ და ვუგებთ ერთმანეთს მოედანზე. ნაკრებში ცოტა სხვაგვარად დგას ეს საკითხი ჩემთვის, მაგრამ ვცდილობ ბოლომდე, რომ ესეც გამოვასწორო. იმედი მაქვს, რომ ნაკრებშიც ისევე წარმატებით ვითამაშებ, როგორც “ბარსაში”.

– დიეგო მარადონამ ისევ გამოთქვა არგენტინის ნაკრების გაწვრთნის სურვილი

– ყველამ კარგად ვიცით, რომ დიეგოს დიდი სურვილია ნაკრებში დაბრუნება, მაგრამ ვერც მე და ვერც ჩემი გუნდელები ამ საკითხს ვერ ვჭრით. ეს არგენტინის ფეხბურთის ფედერაციის გადასაწყვეტია.

– როგორც აღნიშნე, სულ პატარა იყავი, როდესაც ბარსელონაში გადმოხვედი. ხომ არ გაგიჭირდა სხვა ქვეყანაში გადასვლა?

– არა, სიმართლე გითხრათ არა. მენატრებოდა ჩემი სახლ–კარი, მაგრამ მიუხედავად ამისა მაინც დავრჩი კატალონიაში. გამიმართლა იმაში, რომ ადრე მქონდა დებიუტი “ბარსას” შემადგენლობაში და მას შემდეგ ყველაფერი მშვენივრად ამეწყო.