ვინ შეიძლება ჩაანაცვლოს ერნესტო ვალვერდე?
ერნესტო ვალვერდე "ბარსელონას" მთავარი მწვრთნელის პოსტზე მიმდინარე სეზონის დასაწყისში დაინიშნა და, შედეგების მიხედვით, არც თუ ისე ცუდად გამოიყურებოდა მისი გუნდი. ბასკი სპეციალისტის ხელში კატალონიური კლუბი ლა ლიგაში დაუმარცხებელია, სამეფო თასის ფინალშია, თუმცა ჩემპიონთა ლიგას გამოეთიშა.
ერნესტო ვალვერდეს მიმდინარე სეზონში ოქროს დუბლის (ლა ლიგა და სამეფო თასი) მოგების ძალიან რეალური შანსი აქვს, არც ჩემპიონთა ლიგიდან გამოთიშვა იქნებოდა დიდი კატასტროფა, მაგრამ "ბარსელონას" გულშემატკივრები იმან გააცოფა, რომ ვალვერდემ "სტადიო ოლიმპიკოზე" ანგარიშის შენარჩუნებაზე ითამაშა და მანამ სანამ მისმა გუნდმა მესამე გოლი არ გაუშვა, შეტევაზე არც უფიქრია. "ბარსელონას" არაერთი მარცხი გვახსოვს კლუბის დიდების წლებშიც, თუმცა ეს კლუბი მოედანზე ყოველთვის მოსაგებად გამოდის და მსგავსი ფაქტი მისთვის უცხოა.
"ლურჯ-ბროწეულისფერთა" გულშემატკივრები ძალიან გაბრაზებულები არიან და უმრავლესობას ერნესტო ვალვერდეს კლუბიდან წასვლა სურს, თან ასევე უნდა აღვნიშნოთ, რომ კატალონიურ გრანდი მიმდინარე სეზონში საერთოდ არ თამაშობს ისეთ ლამაზ და ლაღ ფეხბურთს, როგორსაც მიგვაჩვია. ამიტომ საერთოდ არაა გამორიცხული, რომ მიმდინარე სეზონის ბოლოს "ბარსელონას" მთავარი მწვრთნელი გაათავისუფლონ. ვინ შეიძლება შეცვალოს ვალვერდე?
მაურიციო სარი
59 წლის იტალიელი სპეციალისტი 2015 წლის ზაფხულიდან "ნაპოლის" უდგას სათავეში და "ცისფრებს" ძალიან კარგ ფეხბურთსაც ათამაშებს, განსაკუთრებით კი მიმდინარე სეზონში.
მიმდინარე სეზონში მაურიციო სარიმ ძირითადი აქცენტი იტალიის სერია ა-ზე გააკეთა და ახლოსაც იყო ჩემპიონობასთან, თუმცა "ნაპოლის" ფეხის დაცდენა "იუვენტუსმა" არ აპატია და გალიდერდა.
მაურიციო სარის მისამართით საქებარი სიტყვები არ დაიშურა პეპ გვარდიოლამაც, როდესაც მისი გაწვრთნილი "მანჩესტერ სიტი" ჩემპიონთა ლიგის ჯგუფურ ეტაპზე სარის "ნაპოლის" დაუპირისპირდა.
კიკე სეტიენი
ესპანელი სპეციალისტი გასულ ზაფხულს "რეალ ბეტისს" ჩაუდგა სათავეში და მისი გუნდი ძალიან კარგ შთაბეჭდილებას ტოვებს, ესპანეთის პრიმერა დივიზიონში მე-5 პოზიციას იკავებს და ევროპის ლიგის საგზურისთვის იბრძვის.
მისი გუნდი, ტრადიციულად, ძალიან ლამაზ და შემტევ ფეხბურთს თამაშობს. გვახსოვს, რომ წინა 2 სეზონის განმავლობაში იგი სათავეში ლა ლიგაში ახლად გადმოსულ "ლას პალმასს" ედგა და შესანიშნავად ათამაშებდა, მისი წასვლის შემდეგ კი კანარის კუნძულელები უკვე განწირული არიან სეგუნდა დივიზიონში დასაბრუნებლად.
ლეონარდო ჟარდიმი
"მონაკოს" 43 წლის პორტუგალიელი მთავარი მწვრთნელი, რომელმაც თითქმის შეუძლებელი შეძლო. ჟარდიმი თეთრ-წითლებს 2014 წლიდან უდგას სათავეში.
ალბათ ყველას ძალიან კარგად გვახსოვს გასულ სეზონში მისი გუნდის მიერ გაკეთებული საოცრებები. "მონაკო" 2016/2017 წლების სეზონში საფრანგეთის ჩემპიონი გახდა 95 ქულით, გაიტანა 107 გოლი, ჩემპიონობა წაართვა "პარი სენ-ჟერმენს", 8 ქულით აჯობა და მასზე 24-ით მეტი გოლი გაიტანა. ლეონარდო ჟარდიმმა თავისი გუნდი ჩემპიონთა ლიგის 1/2 ფინალში გაიყვანა.
ფილიპ კოკუ
47 წლის ჰოლანდიელი მწვრთნელი ამჟამად სათავეში ჰოლანდიურ "პსვ ეინჰოვენს" უდგას, რომელსაც თითქმის უკვე გაფორმებული აქვს ჰოლანდიის ჩემპიონობა. კოკუ "ბარსელონაში" 1998-2004 წლებში გამოდიოდა.
"ბარსელონას" ექს-ნახევარმცველი გასულ სეზონშიც მოისაზრებოდა შესაძლო მწვრთნელად, თუმცა კატალონიელებმა არჩევანი ერნესტო ვალვერდეზე შეაჩერეს. კოკუ ვალვერდესგან განსხვავებით "ბარსელონას" სტილის, შემტევ და უფრო ლამაზ ფეხბურთს თამაშობს.
ამ სიახლეზე კომენტარები გათიშულია.
კომენტარები [ 71 ]