ლიონელ მესი: ვალვერდე არაფერ შუაშია, ყველაფერი ჩვენი ბრალია
ლიონელ მესი გუნდის პრესკოფნერენციაზე ბოლო 4 წლის განმავლობაში პირველად გამოჩნდა. მიუხედავად იმისა, რომ გუნდს ხვალ ესპანეთის თასის ფინალი ელის, არგენტინელმა, ძირითადად, რა თქმა უნდა, "ლივერპულთან" განცდილ კრახზე ისაუბრა.
"მშვიდად ვართ. წინ მნიშვნელოვანი თამაში გველის. ამ მატჩს მნიშვნელობას ის სძენს, რომ ესპანეთის თასის მოგება შეგვიძლია.
"ლივერპულისგან" ძალიან ძლიერი დარტყმა მივიღეთ. ასეთი რამის შემდეგ ფეხზე წამოდგომა რთულია, რაც ჩვენ მომდევნო შეხვედრებშიც დაგვეტყო. ეს ნამდვილად რთული იყო.
ვალვერდეს ბევრი კრიტიკა არ მესმის. ნამდვილად მჯერა, რომ მან შესანიშნავი სამუშაო გასწია და "ლივერპულთან" მომხდარი მისი ბრალი არაა. ეს ჩვენი ბრალია. თამაში ფეხბურთელებმა ჩავაგდეთ.
მინდა, რომ ვალვერდე დარჩეს. წინა სეზონში დუბლი მოვიგეთ და ამის გამეორება ახლაც შეგვიძლია.
"ოქროს ბუცზე" არ ვფიქრობ. ლივერპულში მომხდარის შემდეგ გონს ბოლომდე ჯერ ვერ მოვეგე და პირად მიღწევებზე არ ვფიქრობ. უბრალოდ მინდა, რომ სეზონი ტიტულით დავასრულოთ.
"ლივერპულთან" თამაში არ განმიხილავს, მაგრამ რაც მახსოვს, არის ის, რომ "რომასთან" მატჩს ძალიან ჰგავდა.
კლუბისთვის დუბლი ძალიან მნიშვნელოვანია. თუმცა, ლივერპულში მომხდარმა წელი გააფერმკრთალა.
"ბარსელონაში" ჩემი დარჩენის სურვილი არ გამნელებია. ეროვნულ გუნდში პრობლემები მქონდა და ისევ მინდა ნაკრებთან ერთად რამე მოვიგო. ჩემპიონთა ლიგიდან გამოვარდნას ჩემი აქ დარჩენის სურვილზე არ უმოქმედია.
ჩემპიონთა ლიგის ფინალს მიღმა დარჩენის გამო ბოდიში უნდა მოვიხადოთ.
ყველანი იმედგაცრუებულები ვართ, მაგრამ ჩემი გადასაწყვეტი არაა, იქნება თუ არა გუნდში ცვლილებები.
წინ ფინალი გველის და მისი წაგება არანაკლებ იმედგაცრუებულებს დაგვტოვებს, ვიდრე ახლა ვართ.
ფიზიკურად თავს უკეთ ვგრძნობ. დისკომფორტი იანვრიდან მოყოლებული მაწუხებს, მაგრამ მისი კონტროლი შევძელი და სათამაშოდ ყოველთვის მზად ვარ.
შეცდომა არ უნდა დავუშვათ და "ვალენსიასთან" მატჩს ნაკლებად მოტივირებულები არ უნდა შევხვდეთ. მოედანზე უნდა გავიდეთ და ბოლომდე დავიხარჯოთ.
"ლივერპულთან" მარცხი მსოფლიო ჩემპიონატის ფინალის წაგებისგან განსხვავდებოდა. თუმცა, 3-ბურთიანი უპირატესობის განიავება და მოულოდნელად გამოვარდნა მაინც ძალიან ძნელი იყო.
გრიზმანი? სავარაუდო ტრანსფერებზე არ ვფიქრობ.
არტურო ვიდალს შესანიშნავი სადებიუტო სეზონი აქვს. ის ძალიან გვეხმარებოდა როგორც სასტარტო შემადგენლობაში ყოფნის დროს, ასევე შეცვლაზე შემოსვლის შემდეგ. მას შესაშური შემართება აქვს როგორც მოედანზე, ასევე მის გარეთ."
ამ სიახლეზე კომენტარები გათიშულია.
კომენტარები [ 29 ]