ბარსელონამ, შესაძლოა, შჩესნის კონტრაქტი გაუხანგრძლივოს

"ბარსელონა" გუნდის 34 წლის მეკარესთან, ვოიჩეხ შჩესნისთან თანამშრომლობის გაგრძელებაზე ფიქრობს.

Sport-ის ინფორმაციის თანახმად, "ბარსა" აპირებს, შჩესნის კონტრაქტის ერთი წლით გახანგრძლივება შესთავაზოს, თუმცა კატალონიური კლუბი არ ჩქარობს. "ბლაუგრანა" საბოლოო გადაწყვეტილებას გაზაფხულზე მიიღებს.

იმავე წყაროს ცნობით, თავად პოლონელი კარის დარაჯი ხელშეკრულების გასახანგრძლივებლად მზადაა. მისი მოქმედი კონტრაქტის ვადა ივნისში იწურება.

შჩესნი "ბარსელონამ" გასული წლის ოქტომბერში მარკ-ანდრე ტერ შტეგენის მძიმე ტრავმის შემდეგ დაიმატა და ის გუნდის პირველი მეკარეც გახდა. ვოიჩეხმა მიმდინარე სეზონში 8 მატჩი ჩაატარა და ივარაუდება, რომ ყველა დარჩენილ შეხვედრაში კატალონიელთა კარს პოლონელი კიპერი დაიცავს.