მესის ოპერაცია ხვალ ჩაუტარდება
"ბარსელონას" ლიდერს, ლიონელ მესის, ხვალ, თირკმელზე ოპერაცია ჩაუტარდება. ამ ინოფრმაციას კატალონიური Sport ავრცელებს, რომლის ჟურნალისტების ვარაუდითაც, არგენტინელი ფეხბურთელი "ვალენსიასთან" ესპანეთის თასზე გასამართ დაპირისპირებას გამოტოვებს.
მესიმ დღევანდელი ვარჯიში გამოტოვა. გავრცელებული ინფორმაციით, პირადი მიზეზით, მან ორდღიანი დასვენება ითხოვა და ლუის ენრიკემ მას ამის ნება დართო. თუმცა, Sport-ის ცნობით, საქმე ლეოს ჯანმრთელობას ეხება. მას თირკმლის პრობლემა ჯერ კიდევ გასული წლიდან აწუხებს. თირკმელში კენჭის გავლის გამო, მესიმ მსოფლიოს საკლუბო ჩემპიონატის ნახევარფინალი გამოტოვა. როგორც ირკვევა, მას ეს პრობლემა კვლავ აწუხებს.
ცნობილია, რომ ოპერაცია ძალიან მარტივი იქნება და მესის ფეხბურთიდან დიდი ხნით მოწყვეტას არ გამოიწვევს. ფეხბურთელი სახლში იმავე დღეს დაბრუნდება, ხოლო ვარჯიშს ხუთშაბათს განაახლებს. ივარაუდება, რომ მესი ერთ-ერთი ფეხბურთელი იქნება, რომელსაც ლუის ენრიკე "ვალენსიასთან" დაასვენებს (კატალონიელებს თასის პირველი თამაში 7:0 აქვთ მოგებული). არგენტინელის მოედანზე დაბრუნებას პრიმერას მომდევნო ტურში, "სელტასთან" გასამართ მატჩში უნდა ველოდოთ.
ამ სიახლეზე კომენტარები გათიშულია.
კომენტარები [ 43 ]