ბარსელონა ნიკო უილიამსის ტრანსფერზე იმედს ნელნელა კარგავს

"ბარსელონა" უკვე აღარ არის დარწმუნებული, რომ შეძლებს ნიკო უილიამსის გადმობირებას ბილბაოს "ატლეტიკიდან". მას შემდეგ, რაც ბასკმა ვინგერმა "ბარსელონაში" გადასვლის სურვილი დააფიქსირა, კატალონიურმა კლუბმა თავდაჯერებულად დაიწყო მოლაპარაკებები და მიიჩნევდა, რომ ტრანსფერი ზაფხულში აუცილებლად შედგებოდა.

გასულ ზაფხულს "ბარსელონა" თავად ცდილობდა უილიამსის დარწმუნებას, დაეტოვებინა "ატლეტიკი". წელს კი თავად ფეხბურთელმა გამოხატა ინტერესი “ბლაუგრანაში” გადასვლის მიმართ. "ბარსელონა" მზად იყო გადაეხადა მისი 58 მილიონი ევროს გამოსასყიდი თანხა, თუმცა უილიამსის აგენტმა - ფელიქს ტაინტამ - კლუბისგან გარანტიები მოითხოვა, რომ "ბარსელონა" შეძლებდა მისი რეგისტრაციას, რაც შეთანხმების შეფერხების მიზეზად იქცა.

"ბარსელონა" კარგავს რწმენას

"ბარსელონა" ცდილობდა, დაეარწმუნებინა როგორც უილიამსი, ისე ტაინტა, რომ შეთანხმება აუცილებლად შედგებოდა და ფეხბურთელს სეზონის შემდეგ ეტაპზე დაარეგისტრირებდნენ, მაგრამ Marca-ს ინფორმაციით, კატალონიური კლუბი ახლა თავადაც ეჭვობს, რომ ტრანსფერი წარმატებით დასრულდება. რამდენიმე დღის წინ "ბარსელონაში" ოპტიმიზმი იყო, თუმცა ახლა ეს განცდა მნიშვნელოვნად შემცირდა.

უილიამსს სურს ლამინ იამალთან ერთად თამაში

"ბარსელონა" კვლავაც გადაჭარბებული ხელფასების ზღვარს ზემოთ იმყოფება და სანამ უილიამსს დარეგისტრირებს, ჯერ უნდა გადაიხადოს მისი 60 მილიონი ევროს გამოსასყიდი თანხა. ორივე მხარე გამოსავლის პოვნას ცდილობს, თუმცა ჯერჯერობით შეთანხმების პერსპექტივა არ ჩანს. "ბარსელონაში" შიდა წყაროები ფიქრობენ, რომ ტრანსფერი შესაძლოა საერთოდ ჩაიშალოს. დრო კი იწურება: *ატლეტიკი" 9 ივლისს განაახლებს სეზონისწინა მზადებას და ყველა დაინტერესებული მხარე ცდილობს, ამ დრომდე საკითხი საბოლოოდ გადაწყდეს.

"ბაიერნი" ელოდება განვითარებას

ამავდროულად, "ბაიერნ მიუნხენმაც" გააკეთა სერიოზული მცდელობა ნიკო უილიამსის გადასაბირებლად და "ბარსელონას" შეფერხების ფონზე ესპანელ ვინგერს წარუდგინა წლიური 12 მილიონი ევროს ხელფასის შეთავაზება, ასევე დაადასტურა მზადყოფნა გამოსასყიდი თანხის გადასახდელად, თუმცა Sport-ის ცნობით, უილიამსმა უარი თქვა "ბაიერნთან" მოლაპარაკებებზე მანამ, სანამ "ბარსელონასთან" საკითხი არ გადაწყდება - მისთვის პრიორიტეტად “კამპ ნოუზე” თამაში რჩება.

"ბაიერნსა" და "ბარსელონას" ერთნაირი ალტერნატივები

მნიშვნელოვანია, აღინიშნოს, რომ "ბარსელონასა" და "ბაიერნს" ნიკო უილიამსის ალტერნატივად ერთნაირი ვარიანტები ჰყავთ. ორივე კლუბისთვის შემდეგ კანდიდატად ლუის დიასი განიხილება, თუმცა "ლივერპული" არ ჩანს მზად მოლაპარაკებისთვის, ხოლო მისი ფასი 80–85 მილიონ ევროს შეადგენს, რაც საქმეს ართულებს.

ამასთან, დაბალფასიანი ალტერნატივაა მარკუს რაშფორდი და ვითარება შეიძლება დაიძაბოს, თუ "ბაიერნი" პირველი გადადგამს კონკრეტულ ნაბიჯს მის მიმართ.