რეალ მადრიდმა მსაჯზე წუწუნი უკვე დაიწყო

კვირას გასამართი "ელ კლასიკოს" წინ "რეალ მადრიდმა" უკვე აპრობირებულ მეთოდს მიმართა - კლუბის ოფიციალური არხის, Real Madrid TV-ს საშუალებით "ბლანკოსმა" იერიში შეხვედრის მთავარ არბიტრზე, ალეხანდრო ხოსე ერნანდეს ერნანდესზე მიიტანა.

მადრიდულ გუნდს მოჰყავს სტატისტიკა, რომლის თანახმადაც დედაქალაქელებმა ერნანდესის მიერ განსჯილი თამაშების მხოლოდ 54% მოიგეს, ბოლო 6 თამაშიდან კი მხოლოდ ორში იმარჯვეს. თუმცა "რეალ მადრიდს" ავიწყდება, რომ ამავე მსაჯის მიერ განსჯილი თამაშებიდან "ბარსამ" მხოლოდ 55% მოიგო, უკანასკნელი 7 მატჩიდან კი კატალონიელთა გამარჯვებით მხოლოდ 3 დასრულდა.

გავიხსენოთ ერნანდესის მიერ განსჯილი სკანდალური "ელ კლასიკოც". 2018 წელს "ბარსელონამ" და "რეალ მადრიდმა" კატალონიაში 2-2 ითამაშეს. პირველ ტაიმში სამუელი უმტიტის წინააღმდეგ ძალიან უხეში თამაშის გამო გარეთ ბეილი პირდაპირ წითელ ბარათს იმსახურებდა, მაგრამ მსაჯმა ჯარიმაც კი არ დანიშნა, მოგვიანებით კი უელსელმა გამათანაბრებელი გოლი გაიტანა. მოგვიანებით FIFA-მ ბეილისა და უმტიტის ეპიზოდი აშკარა წითელი ბარათის მაგალითად მოიყვანა.

მადრიდელებს კიდევ უფრო შორს წასვლაც არ დაზარებიათ და მათ მოიძიეს 1994 წლის ინტერვიუ, სადაც 12 წლის ხოსე ერნანდესი აცხადებს, რომ მისი საყვარელი ფეხბურთელები რომარიო და ლაუდრუპი არიან, საყვარელი გუნდი კი "ბარსელონა". საინტერესოა, რატომ არ ინტერესდებიან მადრიდელები იმით, თუ რომელ გუნდს ქომაგობდა ბავშვობაში მათი ცოცხალი ლეგენდა, ლუკა მოდრიჩი.

"ბლანკოსმა" მსგავს ტაქტიკას წინა "ელ კლასიკოს" დროსაც მიმართა და ნაწილობრივ წარმატებითაც. ესპანეთის თასის ფინალის დროს არბიტრმა "ბარსელონას" წინააღმდეგ რამდენიმე უხეში შეცდომა დაუშვა, მაგრამ თასი მაინც კატალონიელებს დარჩათ.