ბარსელონა სამ ისტორიულ მიღწევას უმიზნებს

ესპანეთის თასის ფინალში გუშინდელი გამარჯვების (3-2) შემდეგ "ბარსელონა" მორიგი ტრებლის მოგებას კიდევ ერთი ნაბიჯით მიუახლოვდა. ეს კი იმას ნიშნავს, რომ კატალონიური კლუბი სამ ისტორიულ მიღწევას უმიზნებს.

"ბარსელონას" შანსი აქვს, გახდეს პირველი ევროპული კლუბი, რომელსაც ტრებლი სამჯერ ექნება მოგებული. აქამდე კატალონიელებმა ეს ორჯერ მოახერხეს - 2008/09 და 2014/15 წლების სეზონებში. იგივე შედეგით იწონებს თავს მიუნხენის "ბაიერნი" (2012/13 და 2019/20 წლების სეზონები). მსოფლიო რეკორდს კი ახალზელანდიური "ოკლენდ სიტი" და ეგვიპტური "ალ აჰლი" ფლობენ 4-4 ტრებლით.

დანარჩენი ორი პოტენციური მიღწევა კი კიდევ უფრო რთულად გასამეორებელი ჩანს.

"ბარსელონა" ახლოსაა, ტრებლი შეასრულოს როგორც კაცების, ასევე ქალების გუნდებით. ჰანსი ფლიკის გუნდმა ესპანეთის თასი უკვე მოიგო, ლა ლიგაში ფავორიტია, ჩემპიონთა ლიგის ფინალამდე კი ერთი ნაბიჯი აშორებს. ქალთა გუნდის საქმე არანაკლებ კარგად მიდის - კომფორტული უპირატესობა ჩემპიონატში, ფინალი თასზე და თითქმის განაღდებული ფინალი ჩემპიონთა ლიგაზე ("ჩელსისთან" 4-1 მოგება ნახევარფინალის პირველ მატჩში).

რაც შეეხება მესამე პოტენციურ მიღწევას - აქამდე არასდროს მომხდარა, რომ ერთ კლუბს ერთ სეზონში ჩემპიონთა ლიგა მოეგოს როგორც კაცებში, ასევე ქალებში; ასევე არასდროს მომხდარა, რომ ერთ კლუბს ერთ სეზონში მოეგოს როგორც დიდების, ასევე ახალგაზრდული ჩემპიონთა ლიგა. "ბარსა" კი სამივე ამ ტურნირის მოგებას უმიზნებს. კაცებისა და ქალების საჩემპიონთალიგო პერსპექტივებზე უკვე ვისაუბრეთ, თუმცა ამას ემატება ახალგაზრდული ჩემპიონთა ლიგაც, რომლის ფინალშიც "ბლაუგრანა" ხვალ "ტრაბზონსპორს" შეხვდება. ეს ნიშნავს, რომ კატალონიური კლუბი ახლოსაა, ერთ სეზონში მოიგეს სამივე ჩემპიონთა ლიგა - კაცების, ქალებისა და ახალგაზრდების.