მარათონი იწყება - 7 მატჩი 19 დღეში

"ბარსელონა" სეზონის ბოლო, გადამწყვეტ ნაწილს იწყებს. "ბლაუგრანა" კვლავ სამივე ტურნირზე მონაწილეობს, რაც, რა თქმა უნდა, კარგი ამბავია, მაგრამ ეს ასევე ძალიან დატვირთულ კალენდარს ნიშნავს. კატალონიურ კლუბს ლა ლიგაში, ესპანეთის თასსა და ჩემპიონთა ლიგაზე 3 კვირაზე ნაკლებ დროში, სულ რაღაც 19 დღეში, მინიმუმ 7 მატჩის ჩატარება მოუწევს.

"ბარსა" "ოსასუნათი" დაიწყებს. ჰანსი ფლიკის გუნდი პამპლონელებს ხვალ, 27 მარტს, უმასპინძლებს. ამ თამაშიდან მხოლოდ სამ დღეში, 30 მარტს, "ბლაუგრანა" კატალონიურ დერბიში "ჟირონას" მასპინძლობს. "ბარსელონა" ასევე სულ რაღაც სამ დღეში, ოთხშაბათს, 2 აპრილს, კოპა დელ რეის ნახევარფინალის განმეორებით მატჩში "ატლეტიკოს" ესტუმრება, შაბათს, 5 აპრილს კი, "ბეტისს" საკუთარ კედლებში დაუპირისპირდება.

ესპანეთის ჩემპიონატში "ბეტისთან" თამაშის შემდეგ ჩემპიონთა ლიგის დროც დგება. კატალონიელები "დორტმუნდს" 9 აპრილს და 15 აპრილს, შესაბამისად, ჯერ - შინ, შემდეგ გასვლაზე შეხვდებიან, ამ მატჩებს შორის კი, 13 აპრილს, "ლეგანესს" ეწვევიან.

ამით ყველაფერი არ მთავრდება. თუ "ბარსელონა" ესპანეთის თასის ფინალში გავა, გუნდს 26 აპრილს თამაში მოუწევს. ჩემპიონთა ლიგის 1/2-ფინალში გასვლის შემთხვევაში "ბლაუგრანა" საშინაო მატჩს აპრილის ბოლო კვირაში გამართავს, განმეორებითს კი - მაისის პირველ კვირაში. სამივე ტიტულისთვის ბრძოლა ყოველ 3-4 დღეში ერთხელ თამაშს ნიშნავს.

იმედია, ეს ყველაფერი შედეგს მოიტანს და სეზონის ბოლოს ტიტულებს ვიზეიმებთ!