ბარსას ქალთა გუნდმა ჩემპიონთა ლიგის 1/2-ფინალის საგზური თითქმის გაინაღდა
გუშინ ქალების ჩემპიონთა ლიგაზე 1/4-ფინალური ეტაპის პირველი მატჩები გაიმართა. ტურნირის მოქმედმა ჩემპიონმა და ბოლო წლების საუკეთესო გუნდმა, "ბარსელონამ" სტუმრად დამაჯერებლად მოიგო და 1/2-ფინალის საგზური თითქმის გაინაღდა.
"ბლაუგრანა" 2022/23 წლების ჩემპიონთა ლიგის გათამაშების ფინალისტს, "ვოლფსბურგს" დაუპირისპირდა და 2 წლის წინანდელი შემთხვევისგან განსხვავებით, მარტივად იმარჯვა. გერმანიაში გამართული შეხვედრა სტუმრებმა ანგარიშით 4-1 მოიგეს.
პირველ ტაიმში ერთადერთი გოლი გავიდა და ის გერმანელებმა საკუთარ კარში გაიტანეს. შესვენების შემდეგ კი ესპანელთა მხრიდან თავი პარედესმა, პარალუელომ და შერტენლაიბმა გამოიჩინეს, რასაც მეტოქემ მხოლოდ ერთი ზუსტი დარტყმით უპასუხა.
განმეორებითი შეხვედრა, რომელსაც ბარსელონა უმასპინძლებს, 27 მარტს გაიმართება.
მეოთხედფინალური ბადის მეორე წყვილში "მანჩესტერ სიტიმ" "ჩელსი" მოულოდნელად 2-0 დაამარცხა. ნახევარფინალში "ბარსას" მეტოქე ამ წყვილის გამარჯვებული იქნება.
ამ სიახლეზე კომენტარები გათიშულია.
კომენტარები [ 7 ]