ჰანსი ფლიკმა და ინიაკი პენიამ იჩხუბეს

Sport-ის ინფორმაციით, რამდენიმე დღის წინ ჰანსი ფლიკსა და ინიაკი პენიას შორის დაძაბული საუბარი შედგა და ჩხუბით დასრულდა. საბოლოოდ, ბარსას მეკარემ გერმანელის მიერ ორგანიზებული გუნდური შეხვედრა დატოვა, რაც, სავარაუდოდ, მის სიტუაციას უფრო დაამძიმებს და სასტარტო შემადგენლობაში ადგილის დაბრუნების შანსს გაურთულებს.

მარკ-ანდრე ტერ შტეგენის ტრავმის გამო, სეზონის სტარტზე ბარსელონას პირველი მეკარის სტატუსი პენიამ მოიპოვა და ვოიცეხ შესნის ტრანსფერის შემდეგაც არაფერი შეცვლილა, მაგრამ, მოგვიანებით, ჰანსი ფლიკმა გადაწყვიტა, რომ ეს ადგილი პოლონელს ეკუთვნის. ინიაკიმ გერმანელი მწვრთნელისგან ახსნა-განმარტება მოითხოვა, რაც კარგად არ დასრულდა.

გავრცელებული ცნობებით, გარდამტეხი ფაქტორი ის იყო, რომ პენიამ ესპანეთის სუპერ თასის ნახევარფინალურ მატჩამდე (ბილბაოს წინააღმდეგ) გამართულ შეხვედრაზე დააგვიანა. მიუხედავად იმისა, რომ ინიაკიმ შეცდომა აღიარა, ფლიკმა, რომელიც დისციპლინას დიდ ყურადღებას აქცევს, იგრძნო, რომ მას თვითკრიტიკა აკლდა და 25 წლის მეკარეს უბრძანა, ახალი როლი მიეღო. ამან პენია გაანაწყენა და საკუთარ მომავალზეც დააფიქრა.

შესნიმ ბარსელონას რიგებში პირველი მატჩი, ბილბაოსთან ესპანეთის სუპერ თასის ნახევარფინალში გამართულ მატჩამდე 4 დღით ადრე, კოპა დელ რეიზე, მიმდინარე წლის 4 იანვარს ჩაატარა. პოლონელის დებიუტის შემდეგ, პენიამ მონაწილეობა მხოლოდ 3 მატჩში მიიღო, თანაც, აქედან ერთში ის ცვლილებაზე გამოვიდა, რადგან შესნი რეალ მადრიდთან დაპირისპირებაში (ესპანეთის სუპერ თასის ფინალში) მოედნიდან გააძევეს. ეს დისკვალიფიკაცია კოპა დელ რეიზეც გადადიოდა და, ამიტომაც, ფლიკი იძულებული იყო, კარში მომდევნო შეხვედრაშიც პენია დაეყენებინა. შესაბამისად, გამოდის, მას შემდეგ, რაც ინიაკიმ ფლიკის მიერ დანერგილი წესი დაარღვია, გერმანელმა ის შესნის მხოლოდ ერთხელ ამჯობინა.