რეალ მადრიდი კლასიკოსთვის "ტრადიციულად" ემზადება

"რეალ მადრიდი" თავისი ოფიციალური არხის, Real Madrid TV-ს "დანიშნულებისამებრ" გამოყენებას განაგრძობს.

ესპანეთის სუპერ თასის ფინალის წინა დღეს "ბლანკოსის" ოფიციალურმა სატელევიზიო არხმა მოამზადა 7-წუთიანი ვიდეო, რომელშიც დღევანდელი დაპირისპირების მთავარ არბიტრს, ხესუს ხილ მანსანოს აკრიტიკებს. ეს დედაქალაქელებისთვის უკვე ჩვეული ტაქტიკაა - წინასწარ ზეწოლა მოახდინონ არბიტრზე.

არადა, ხილ მანსანოს "რეალ მადრიდის" მხრიდან ზეწოლა არაფერში ჭირდება, რადგან "ბარსელონას" მიმართ მისი უარყოფითი დამოკიდებულება ეჭვებს არ იწვევს.

მანსანოს სულ 3 "ელ კლასიკოში" უმსაჯია და სამივე "რეალ მადრიდის" გამარჯვებით დასრულდა.

40 წლის მსაჯი მადრიდული გუნდის ისტორიაში ერთ-ერთი ყველაზე "კარგი" შედეგის მქონე არბიტრია. "ბლანკოსმა" მის მიერ განსჯილი თამაშების 78% მოიგო, როდესაც "ბარსელონას" შემთხვევაში ეს მაჩვენებელი მხოლოდ 63% არის. მანსანოს მიერ განსჯილ შეხვედრებში ყველაზე კარგი შედეგი სწორედ "რეალ მადრიდს" აქვს და ეს გუნდი სხვებს ამ მხრივ გაცილებით აღემატება.

მანსანოს "ბარსას" შეხვედრაში 41-ჯერ უმსაჯია და კატალონიური გუნდის ფეხბურთელი მოედნიდან მან 10-ჯერ გააძევა, ანუ საშუალოდ 0.24 წითელი ბარათი მატჩში.

მიუხედავად იმისა, რომ "რეალ მადრიდის" თამაშში მანსანოს უფრო მეტჯერ (50-ჯერ) უმსაჯია, მან მადრიდელ ფეხბურთელებს გაცილებით ნაკლები წითელი ბარათი უჩვენა - მხოლოდ 5 (საშუალოდ 0.10 წითელი ბარათი). სხვაობაა ყვითელ ბარათებშიც - 41 მატჩში 101 გაფრთხილება "ბარსას" და 50 მატჩში 93 გაფრთხილება "რეალ მადრიდს".

ხილ მანსანოს გაუგებარი და უსამართლო წითელი ბარათი აქვს ნაჩვენები ლუის სუარესისთვის და ნეიმარისთვის, მას მოედნიდან გაძევებული ჰყავს ლეო მესიც, ხოლო ლევანდოვსკისთვის წითელი ბარათის ჩვენების შემდეგ მატჩის მიმოხილვაში ისეთი რამ ჩაწერა, რის გამოც პოლონელს 3 თამაშის გამოტოვება მოუხდა.

ფაქტია, რომ ხესუს ხილ მანსანოს "რეალ მადრიდის" მხრიდან ზეწოლა არ სჭირდება, მაგრამ "სიფრთხილეს თავი არ სტკივა".