ბუნკერად ქცეული სავარჯიშო ბაზა და ოფისი - როგორ მუშაობს ჰანსი ფლიკი ბარსელონაში?

Jijantes-ის ინფორმაციით, ჰანსი ფლიკი დღის უდიდეს ნაწილს სავარჯიშო ბაზაზე, თავის ოფისში ატარებს, რომელიც მის "ბუნკერად" იქცა. ქომაგები, რომლებიც ადგილზე ფეხბურთელების სანახავად მიდიან, გაკვირვებულნი არიან, რადგან ისინი გერმანელის ობიექტიდან გამოსვლას ყოველთვის ხედავენ, მაგრამ შესვლას - ვერასდროს. ჰანსის ბაზაზე ძალიან ადრე მისვლა უყვარს, ზოგჯერ 3-4 საათით ადრეც კი.

კატალონიურმა კლუბმა ფლიკს მანქანა მისცა, თუმცა, პირდაპირს სახლში წასვლის ნაცვლად, გერმანელი სავარჯიშო ბაზის მიმდებარე ტერიტორიაზე მოძრაობს, მანქანას მთავარ შესასვლელთან ახლოს აყენებს და ფანებს ავტოგრაფებს ურიგებს. "არ გამომყვეთ ხოლმე, ეს სახიფათოა. ავტოგრაფებისთვის ყოველთვის ამ ტროტუარზე გავჩერდები," - უთხრა ჰანსიმ გულშემატკივრებს.

რამდენიმე მოთამაშე ფლიკის მუშაობით გაკვირვებულია. ის ხშირად ფეხბურთელთა ფიტნესს ყოველდღიურად ამოწმებს, თავის ტრავმირებულ შეგირდებს რეაბილიტაციის პროცესზე ეკითხება და მათი მდგომარეობით ინტერესდება.

ფლიკმა პირველ გუნდში ბარსა ატლეტიკიდან ბევრი ახალგაზრდა გამოიძახა, რათა ისინი წაეხალისებინა. მიუხედავად იმისა, რომ მათ კორდობასთან ფლეიოფის ფინალი წააგეს, გერმანელმა ახალგაზრდა მოთამაშეებს შესანიშნავი სეზონის ჩატარება მიულოცა.

ჰანსიმ იცის, რომ საკუთარი ფეხბურთელები თავისი მეგობრები არ არიან და ამას არც ცდილობს, მაგრამ მას სურს, დარწმუნებული იყოს, რომ გუნდი ყოველთვის ერთიანია.

ამერიკული ტურნეს დასრულების შემდეგ, კატალონიაში დაბრუნებისთანავე, ფლიკი თავის ახალ სახლში მივიდა და მეზობლები მაშინვე გაიცნო. ისინი გერმანელის კეთილშობილებით სასიამოვნოდ გაკვირვებულნი იყვნენ.