ჩავის ბარსელონადან 4 ფეხბურთელის გაშვება სურდა

უკვე ვიცით, რომ მომავალი სეზონიდან ბარსელონას ჰანს-დიტერ ფლიკი გაწვრთნის, თუმცა, სანამ ხელმძღვანელობა ჩავის მოულოდნელად გაათავისუფლებდა, ის ახალი სეზონისთვის ემზადებოდა.

ESPN-ის ინფორმაციით, ჩავი ერნანდესი ბარსადან რობერტ ლევანდოვსკის, ჟოაუ კანსელუს, ჟოაუ ფელიშისა და ვიტორ როკეს გაშვებას გეგმავდა.

მწვრთნელის ცვლილებების ფონზე, ბუნებრივია, რომ ამ ფეხბურთელთა ბედი, შესაძლოა, შეიცვალოს. გავრცელებული ცნობებით, ფლიკი ლევანდოვსკიზე იმედებს ამყარებს და მისი შენარჩუნება სურს. ამასთან, კლუბში ფიქრობენ, რომ გერმანელთან ერთად ვიტორ როკეს სიტუაციაც განსხვავებული იქნება.

რაც შეეხებათ პორტუგალიელ მოთამაშეებს - მათ ბედზე ინფორმაცია, ჯერჯერობით, არ გვაქვს, თუმცა, თუ გავრცელებულ ცნობებს დავუჯერებთ, ბარსელონა კანსელუსა და ფელიშის შენარჩუნებას კვლავ იჯარით თუ შეძლებს. როგორც Sport-ი იტყობინება, ჰანსის ჟოაუებთან დაკავშირებით ეჭვები აქვს.

ფლიკი ბარსელონაში დღეს ჩამოვა და გეგმებზე ნელ-ნელა ყველაფერი გაირკვევა. ფაბრიციო რომანო და Mundo Deportivo იუწყებიან, რომ გერმანელს ერთი სული აქვს, მუშაობა დაიწყოს. ის ჟოან ლაპორტასა და დეკუს დაუყოვნებლივ გაესაუბრება, რათა სატრანსფერო ფანჯარა დაგეგმოს - პირველი საზრუნავი სერჟი რობერტოს კონტრაქტის გახანგრძლივების საკითხი და გვიდო როდრიგესის პოტენციური ტრანსფერი იქნება.