რაფა მარკესი ბარსას მომავალი მწვრთნელობის პირველი კანდიდატია
Sport იტყობინება, რომ "ბარსელონა" ჩავის პოტენციურ ჩამნაცვლებელს აქტიურად აღარ ეძებს. ამ ფონზე "ბარსა ატლეტიკის" თავკაცი რაფა მარკესი "ბლაუგრანას" მომავალი მწვრთნელობის პირველი ვარიანტი გახდა.
საქმე ისაა, რომ არსებულ კანდიდატებთან სიტუაცია ნელ-ნელა ჩიხში შევიდა. ჰანსი ფლიკის ვარიანტი კლუბისთვის ნაკლებად საინტერესოა, რამდენადაც მას გერმანიის გარდა, ფაქტობრივად, არსად უმუშავია. რობერტო დე ძერბის გადმობირება რთული იქნება, რადგან ის თავისუფალი აგენტი არაა. იულიან ნაგელსმანს კი "ბაიერნში" დაბრუნებას უწინასწარმეტყველებენ. შედეგად "ბარსელონა" კანდიდატების ძებნას შიდა სისტემაში შეუდგა.
მიუხედავად ამისა, კლუბში კვალავ იმედოვნებენ, რომ ჩავი ერნანდესის დარჩენა შესაძლებელია. არსებული ინფორმაციით, ჩავი არ წავა, თუ გარკვეული პირობები დაკმაყოფილდება. კერძოდ, "ბარსელონამ" ჩემპიონთა ლიგა უნდა მოიგოს და კატალონიელებმა შემადგენლობის გასაძლიერებლად 300 მილიონი ევროს ინვესტიცია უნდა განახორციელონ. თუმცა "ბარსელონას" ფინანსური მდგომარეობის გათვალისწინებით, ეს ძალიან რთული იქნება.
ამ სიახლეზე კომენტარები გათიშულია.
კომენტარები [ 10 ]