რამდენიმე თვეში ანსუ ფატი დაბრუნდება - რას იზამს ბარსელონა?

ზაფხულში ანსუ ფატი დაგვიბრუნდება, ერთ დროს მჩქეფარე ტალანტი, რომელმაც ტრავმიანობას ვერაფერი მოუხერხა და მისი მზეც ნელ-ნელა ჩაესვენა.

"ბარსელონას" ყოფილმა 10-იანმა მიმდინარე სეზონში "ბრაიტონის" მაისური 23-ჯერ მოირგო, არადა, ფატის ტრანსფერიდან მოყოლებული დე ძერბის გუნდმა 15-ით მეტი შეხვედრა გამართა. ამას თან ერთვის ფაქტი, რომ ფატიმ 90 წუთით მხოლოდ ერთ მატჩში მიიღო მონაწილეობა. ეს თამაში "ბრაიტონმა" ევროპა ლიგის ჯგუფურ ეტაპზე "აეკთან" გამართა და საშინაო არენაზე 2:3 დამარცხდა, ანსუს კი განსაკუთრებული არაფერი გაუკეთებია.

რაც შეეხება ეფექტიანობასა და პროდუქტიულობას, ფატის არც ამ მხრივ აქვს კარგად საქმე. როგორც ვთქვით, მან 23-ჯერ ითამაშა, რა დროშიც ანსუმ მეტოქის კარის აღება სულ რაღაც 4-ჯერ შეძლო. ფატის კარიერული რეგრესი რომ აქვს, ამაზე თუნდაც ის მეტყველებს, რომ მან ერთით მეტ, 24 შეხვედრაში 7 გოლის გატანა ჯერ კიდევ მაშინ შეძლო, როდესაც "ბარსელონას" მაისურით 17 წლის ასაკში ლა ლიგის სადებიუტო სეზონს ატარებდა, მაგრამ შემდეგ იყო ტრავმები, ტრავმები და ისევ ტრავმები.

ანსუ ფატიმ "ბრაიტონის" რიგებშიც კი მოასწრო ტრავმის მიღება, რის გამოც მან 14 თამაში გამოტოვა. მისი ამ სავალალო სტატისტიკიდან გამომდინარე, ნაკლებად სავარაუდოა, რომ "ბრაიტონს" მისი სრულფასოვნად შეძენის სურვილი გაუჩნდეს. აი, რას იზამს "ბარსელონა", ეს კიდევ სხვა საკითხია, რომელსაც წინ საკმაოდ რთული და დატვირთული ზაფხული ელის.

იმ შემთხვევაში თუ "ბარსელონამ" საიჯარო ხელშეკრულების მქონე ჟოაუ ფელიში დაიტოვა, წესით, ამან ანსუს შანსები ბოლომდე უნდა ჩააქროს. გარდა ფელიშისა, მარჯვენა ფლანგზე ან ჩავის, ან მის ჩამნაცვლებელს ფერანისა და როკეს ვარიანტიც ექნება. ჰოდა, აქედან გამომდინარე, არც ფატის უნდა სურდეს სათადარიგოთა სკამზე ჯდომით საუკეთესო წლების დაკარგვა, იმ წლების, რომელთა განმავლობაშიც ანსუ ისედაც უსამართლოდ და გულსატკენად დაიტანჯა.