ბარსელონას პრიორიტეტები ზაფხულის სატრანსფერო ფანჯარაზე

Tribuna-ს ინფორმაციით, ზაფხულის სატრანსფერო ფანჯრის გახსნამდე 100 დღეზე მეტი რჩება, მაგრამ "ბარსელონამ" პრიორიტეტები უკვე დაისახა.

მწვრთნელის მოყვანა

პირველი მისია ახალი მწვრთნელი დანიშვნა იქნება. ამის გარეშე ტრანსფერების განხორციელება მიზანშეწონილი არაა. "ბარსას" ჰანსი ფლიკი, რობერტო დე ძერბი და სერჟიო კონსეისაუ დაუკავშირეს, მაგრამ არავინ იცის, ბოლოს ვინ მოვა. "ბარსელონა" ისეთ სპეციალისტს ეძებს, რომელსაც კატალონიელთა დნმ აქვს.

საყრდენის შეძენა 

ჩავი იძულებული გახდა, საყრდენ ნახევარმცველად მცველი ათამაშოს. ჯერჯერობით, ანდრეას კრისტენსენი ნორმალურად გამოიყურება, მაგრამ საკითხავია, დიდ მატჩებში მისი საყრდენობა რამდენად გაამართლებს.

ეჭვგარეშეა, რომ "ბლაუგრანამ" დაცვითი ნახევარმცველი უნდა შეიძინოს. "ბარსელონას" რადარზე ამადუ ონანა და იოზუა კიმიხი არიან. ასევე, შესაძლოა, ერთ-ერთი ვარიანტი ნიკო გონსალესი იყოს - "ლა მასიელი" "პორტუში" შესანიშნავად ასპარეზობს, "ბარსას" კი მისი გამოსყიდვის უფლება აქვს.

ფლანგის მცველების ყიდვა

სერჟი რობერტოსა და მარკოს ალონსოს სეზონის ბოლოს კონტრაქტი ეწურებათ, რაც ნიშნავს, რომ თუ "ბარსელონამ" მათ არ გაუხანგრძლივებს, შემცვლელებზე უნდა იზრუნოს.

სწორედ ამიტომ, "ბარსას" ალფონსო დევისის შეძენა სურდა, მაგრამ კანადელი, დიდი ალბათობით, "რეალ მადრიდში" გადავა.

კატალონიური გრანდი, პირველ რიგში, ჟოაუ კანსელუს შენარჩუნებაზე იმუშავებს.

მარცხენა გარემარბის მოყვანა

ნეიმარის წასვლის შემდეგ გუნდს ამ პოზიციაზე უჭირს. ჟოაუ ფელიში ხანდახან ბრწყინვალეა, მაგრამ, ფერან ტორესის მსგავსად, არასტაბილურია. ალბათ, ახალი მწვრთნელი შანსს ანსუ ფატისაც მისცემს.

როგორც იწერება, თუ "ბარსა" ზაფხულში დიდ თანხას დახარჯავს, პირველ რიგში, სწორედ ამ პოზიციის გაძლიერებაზე იფიქრებს. კლუბს ხვიჩა კვარაცხელია, რაფაელ ლეაუ და კილიან მბაპეც კი დაუკავშირეს.

მეკარის მოყვანა

"ბარსელონას", შესაძლოა, მეკარეც დასჭირდეს. კლუბის ინიაკი პენიათი აღფრთოვანებული არაა, თუმცა, თუ ის წასვლას არ გადაწყვეტს, "ბარსა" ტერ შტეგენის დუბლიორს არ მოიყვანს.

იმ შემთხვევაში, თუ პენია წავა, კატალონიურ კლუბს დავიდ დე ხეას ვარიანტი ექნება.

ფეხბურთელების გაშვება

ტრანსფერების განსახორციელებლად, "ბარსელონამ" ფეხბურთელები უნდა გაყიდოს და თანხა იშოვოს. გავრცელებული ცნობებით, "ბლაუგრანამ", გაყიდვებითა და ხელფასების შემცირებით, სულ მცირე, €200 მილიონი უნდა გამოიმუშაოს, რათა ახალი მოთამაშეების მოყვანა შეძლოს.

შესაბამისად, ზაფხულში, მოსალოდნელია, რომ ბევრ ფეხბურთელს გასასვლელი კარისკენ მიუთითებენ.