ბილბაო 4-2 ბარსელონა | მიმოხილვა

"ბარსელონა" ესპანეთის თასზე ასპარეზობას გამოეთიშა. კატალონიური კლუბი 1/4 ფინალში ბილბაოს "ატლეტიკს" დაუპირისპირდა და დამატებით დროში 2-4 დამარცხდა.

ბასკებმა თამაში აქტიურად დაიწყეს და პირველივე წუთზე გორკა გურუზეტის გოლით დაწინაურდნენ. "ბარსამ" პირველ ტაიმში თამაშის შემოტრიალება მოახერხა და 26-ე წუთზე რობერტ ლევანდოვსკის გოლით ანგარიში გაათანაბრა, 32-ე წუთზე კი ლამინ იამალის გოლით წინაც გავიდა და ტაიმი 2-1 მოიგო.

"ატლეტიკმა" მეორე ნახევარიც სწრაფი გოლით დაიწყო - 49-ე წუთზე ოიჰან სანსეტმა ანგარიში გაათანაბრა. მიუხედავად იმისა, რომ "ბარსას" ბევრი მომენტი აღარ შეუქმნია, გუნდს დაწინაურება მაინც შეეძლო. განსაკუთრებით გამოსარჩევი ლამინ იამალის ეპიზოდებია: ერთ მომენტში ახალგაზრდა ფეხბურთელმა ერთი-ერთზე არაზუსტად დაარტყა, მეორე შემთხვევაში კი მარჯვენა ფეხით ცარიელ კარში ვერ გაიტანა. 

დამატებით დროში "ბლაუგრანა" უშანსოდ დამარცხდა. ინიაკი ვილიამსმა პირველი დამატებითი ტაიმის ბოლოს "ატლეტიკი" კვლავ დააწინაურა, 121-ე წუთზე კი ნიკო ვილიამსმა საბოლოო ანგარიში დააფიქსირა და "ბარსელონა" ესპანეთის თასს გამოთიშა. 

ამგვარად, კატალონიური კლუბი ასპარეზობას მხოლოდ ლა ლიგასა და ჩემპიონთა ლიგაზე გააგრძელებს.