ზუსტად 1 წლის წინ: ბარსელონამ ესპანეთის სუპერ თასის ფინალში რეალ მადრიდი დაამარცხა

14 იანვარს "ბარსელონა" და "რეალ მადრიდი" ესპანეთის სუპერ თასის ფინალში ერთმანეთს დაუპირისპირდებიან. ეს უცხო შემთხვევა ნამდვილად არაა - ზუსტად 1 წლის წინ, ამ დღეს, ამავე ტურნირის ფინალში "ელ კლასიკო" შედგა, რომელშიც "ბარსამ" 3-1 იმარჯვა და ჩავი ერნანდესის ხელში პირველი ტიტული მოიგო.

გარდამტეხი მომენტი

ტიტულის მოპოვება მნიშვნელოვანი იყო, მაგრამ ამან გუნდზე ჩვეულებრივზე ბევრად დიდი გავლენა მოახდინა. ფინალამდე საქმეები კარგად არ მიდიოდა - "ბარსელონა" ლა ლიგას ლოდერობდა, მაგრამ ჩემპიონთა ლიგას ჯგუფური ეტაპიდანვე დაემშვიდობა.

ჩავიმ მატჩის შემდეგ თქვა: "ფეხბურთელების გამო ძალიან ბედნიერი ვარ - ისინი უსამართლო კრიტიკას იღებდნენ. დღეს ისინი გათავისუფლდნენ. ეს გამარჯვება ჩვენს თავდაჯერებულობას ძალიან გაზრდის და საშუალებას მოგვცემს, მშვიდად ვიმუშაოთ."

მწვრთნელი მართალი იყო - ამის შემდეგ გუნდი ესპანეთის ჩემპიონი გახდა.

გასული წელს სუპერ თასის ფინალში გავიმ, ლევანდოვსკიმ და პედრიმ გაიბრწყინეს. სამწუხაროდ, გავი ტრავმის გამო წლევანდელ ფინალში ვერ იქნება. რაც შეეხებათ რობერტსა და პედრის - პოლონელმა ცენტრფორვარდმა "ოსასუნასთან" უმნიშვნელოვანესი გოლი გაიტანა, კანარელი ნახევარმცველი კი ლაზარეთიდან ახლახან დაბრუნდა და გუშინ შესანიშნავად ითამაშა.

ისტორიის გამეორება?

გასულ სეზონსა და მიმდინარეს შორის მსგავსებები არის, მაგრამ ასევეა სხვაობებიც - "ბარსაც" ამჯერად ჩემპიონთა ლიგის ჯგუფიდან გავიდა, მაგრამ ლა ლიგას ვეღარ ლიდერობს. მეორე მხრივ, 2022/23 წლების სეზონის მსგავსად, "ბარსელონა" ფინალს ამჯერადაც ისე ხვდება, რომ "რეალ მადრიდთან" ჩემპიონატის ბოლო მატჩი წაგებული აქვს.

გასულ სეზონში ჩავის გუნდმა მადრიდელებს შანსი არ დაუტოვა და შესანიშნავ სტილში დაამარცხა. კვირას "ელ კლასიკოში" კვლავ მოგების შემთხვევაში "ბარსა" კვლავ უდიდეს მოტივაციას მიიღებს, თანაც, სეზონის უმნიშვნელოვანეს ეტაპზე.