კლასიკური მოგება ქალების ელ კლასიკოში

რამდენიმე წუთის წინ დასრულდა ქალების "ელ კლასიკო", რომელიც "ბარსელონამ" "კლასიკური" ანგარიშით მოიგო.

"ბარსელონას" ქალების გუნდს "რეალ მადრიდთან" აქამდე ყველა თამაშში მოგება ჰქონდა და გამოკვეთილ ფავორიტად დღესაც "ბლაუგრანა" ითვლებოდა.

კატალონიელებმა მადრიდელ სტუმრებს 5 უპასუხო ბურთი გაუტანეს. "ბარსამ" პირველი ტაიმი 3-0 მოიგო, მეორე კი - 2-0.

ანგარიში მსოფლიოს საუკეთესო ფეხბურთელმა, აიტანა ბონმატიმ გახსნა. პირველი ტაიმის მიწურულს თავი ჰანსენმა და მარიონა კალდენტეიმაც გამოიჩინეს.

90-ე წუთამდე ანგარიში უცვლელი იყო, თუმცა ბოლო წუთებში თავი "ბარსას" ორმა ახალგაზრდა ფეხბურთელმა გამოიჩინა. მეოთხე გოლი კლაუდია პინამ გაიტანა, ხოლო შეხვედრაში წერტილი 17 წლის ვიკი ლოპესმა დასვა, რომელიც ქალების "ელ კლასიკოს" ყველაზე ახალგაზრდა მეგოლედ იქცა.

"ბარსელონას" ქალთა გუნდს მიმდინარე სეზონში ყველა თამაში მოგებული აქვს. ესპანეთის ჩემპიონატის 9 ტურში კატალონიელებმა გაიტანეს 39 და გაუშვეს მხოლოდ 2 გოლი.

1-0

2-0

3-0

4-0

5-0