ქალების ჩემპიონთა ლიგა: ჩემპიონის წარმატებული სტარტი

გუშინ სტარტი ქალების ჩემპიონთა ლიგის ახალმა გათამაშებამ აიღო და მოქმედმა ჩემპიონმა, "ბარსელონამ" 2023/24 წლების სეზონიც ჩვეულ სტილში დაიწყო.

კატალონიურმა გუნდმა პირველ ტურში "ბენფიკას" უმასპინძლა და ლისაბონური მეტოქე 5-0 გაანადგურა. "ოქროს ბურთის" ბოლო მფლობელებმა, ალექსია პუტელიასმა და აიტანა ბონმატიმ 2-2 გოლი გაიტანეს, წერტილი კი შეხვედრაში აზიზატ ოშოალამ დასვა.

ჯგუფის მეორე შეხვედრაში "აინტრახტმა" "როზენგარდი" სტუმრად 2-1 დაამარცხა, რაც იმას ნიშნავს, რომ A ჯგუფს "ბარსელონა" ლიდერობს.

"ბარსელონას" ქალების გუნდმა მიმდინარე სეზონში ჩატარებული 9 თამაშიდან ყველა მოიგო, უკანასკნელ სამ მათგანში კი 19 გოლი გაიტანა და კარი მშრალად შეინახა.