19-წლამდელების მეოთხე მოგება და იააკობიშვილის ზედიზედ მე-3 მშრალი თამაში

"ბარსელონას" პირველ გუნდში უკვე იმდენი 19-წლამდელი ფეხბურთელია, რომ წესით ახალგაზრდულ გუნდს უნდა უჭირდეს, მაგრამ პირიქით ხდება. "ბლაუგრანას" 19-წლამდელთა გუნდმა ახალგაზრდულ ჩემპიონთა ლიგაზე მეოთხე თამაშიც მოიგო და ჯგუფიდან გასვლა ვადაზე ადრე გაინაღდა.

"ბარსას" ახალგაზრდული გუნდი დონეცკის "შახტარს" ნეიტრალურ სტადიონზე დაუპირისპირდა და 3-0 დაამარცხა. გოლები ნილ კალდერომ, დანი როდრიგესმა და ალბერტ ნავარომ გაიტანეს.

ოთხივე მოგების დროს "ბარსელონას" კარში ქართული ფესვების მქონე უნგრელი მეკარე არონ იააკობიშვილი იდგა, რომელმაც ბოლო 3 შეხვედრა გოლის გაუშვებლად ჩაატარა.