ბარსელონა 5-0 ანტვერპენი | მიმოხილვა

"ბარსელონამ" ჩემპიონთა ლიგის ჯგუფური ეტაპის პირველ ტურში სახლში "ანტვერპენი" 5-0 გაანადგურა. 

"ბარსამ" პირველი გოლი მე-11 წუთზე გაიტანა: დიდებული კომბინაციისა და ილქაი გიუნდოგანის ასისტის შემდეგ მეტოქის კარი ჟოაუ ფელიშმა აიღო. მალევე რობერტ ლევანდოვსკიმ (19') უპირატესობა ორამდე გაზარდა - ფრენკი დე იონგმა ბრწყინვალე პასით "ანტვერპენის" მთელი ნახევარდაცვა და დაცვა გაჭრა, რის შემდეგაც ფელიშმა პოლონელს ჩაუწოდა და ანგარიში 2-0 გახდა.

ამ გოლიდან 3 წუთში სტუმართა ნახევარმცველმა, ჟელე ბატაიმ რაფინიას კარგი თამაშის შემდეგ ბურთი საკუთარ კარში ჩაჭრა - 3-0. ერთი მომენტი ბელგიელებმაც შექმნეს, მაგრამ მეტოქის დარტყმა ტერ შტეგენმა მოიგერია.

მეორე ტაიმში კატალონიელებმა კიდევ 2 გოლი გაიტანეს. 54-ე წუთზე გავიმ მარცხენა ფეხით სტუმართა ფრანგ მეკარეს შანსი არ დაუტოვა და ჩემპიონთა ლიგაზე პირველი გოლი გაიტანა. საბოლოო ანგარიში ჟოაუ ფელიშმა (მატჩის საუკეთესო ფეხბურთელი) დააფიქსირა, რომელმაც რაფინიას შესანიშნავი ჩაწოდების შემდეგ თავით შეაგდო - 5-0.

"ბარსელონამ" ბრწყინვალე ფეხბურთი ითამაშა და H ჯგუფში პირველ ადგილზე იმყოფება. ჯგუფის მეორე შეხვედრაში "პორტუმ" "შახტარი" 3-1 დაამარცხა.

ფეხბურთელთა შეფასებები:

საინტერესო ფაქტები:

• ლამინ იამალი "ბარსელონას" ისტორიაში ყველაზე ახალგაზრდა ფეხბურთელია, ვინც ჩემპიონთა ლიგაზე ითამაშა, ზოგადად ტურნირის ისტორიაში კი მეორე ყველაზე ახალგაზრდა დებიუტანტია;
• რობერტ ლევანდოვსკი 35 წლისა და 29 დღის ასაკში ყველაზე ასაკოვანი ფეხბურთელია, ვინც ჩემპიონთა ლიგაზე "ბარსელონას" რიგებში გოლი გაიტანა. მანამდე რეკორდი ჟერარ პიკეს ეკუთვნოდა, რომელმაც 2021 წელს, 34 წლისა და 260 დღის ასაკის "დინამო კიევს" გაუტანა;
• 2003/04 წლების სეზონის შემდეგ, ჟოაუ ფელიში მე-4 ფეხბურთელია, ვინც ჩემპიონთა ლიგაზე "ბარსელონას" რიგებში სადებიუტო მატჩში გოლი და ასისტი მიითვალა. პორტუგალიელის გარდა ეს შედეგი მაქსი ლოპესს, სერხიო ბუსკეტსსა და ფერან ტორესს აქვთ;
• რობერტ ლევანდოვსკიმ ევროტურნირებზე მე-100 გოლი გაიტანა. აღნიშნული მაჩვენებლით ის მხოლოდ კრიშტიანუ რონალდუსა და ლიონელ მესის ჩამორჩება;
• "ბარსელონას" სასტარტო შემადგენლობაში მხოლოდ 2 ესპანელი ფეხბურთელი იყო, რაც 2020 წლის დეკემბრის ("ლევანტეს" წინააღმდეგ) შემდეგ პირველად მოხდა;
• ჟოაუ ფელიში ბოლო 5 წლის განმავლობაში "ბარსას" პირველი ფეხბურთელია, ვინც ჩემპიონთა ლიგაზე 20 წუთში გაიტანა და საგოლე პასი გააკეთა. ბოლოს ეს 2018 წელს ლეო მესიმ "ჩელსის" წინააღმდეგ შეძლო.
• ჟოაუ ფელიში "ბარსელონას" ისტორიაში ერთადერთი ფეხბურთელია, ვინც ჩემპიონთა ლიგაზე სადებიუტო მატჩში 2 გოლი და ასისტი მიითვალა. 

"ბარსელონას" შემდეგი მატჩი ლა ლიგის ეგიდით, "სელტას" წინააღმდეგ (23 სექტემბერს) ელის, ჩემპიონთა ლიგაზე კი გუნდის მომდევნო მეტოქე "პორტუ" იქნება, რომელსაც 4 ოქტომბერს სტუმრად დაუპირისპირდება.