მატჩამდე განაღდებული ჩემპიონობა თუ ესპანიოლის მოედანზე ზეიმი

33 ტურის შემდეგ "ბარსელონას" პირველი შანსი აქვს, რომ ჩემპიონობა ოფიციალურად გაინაღდოს და მიმდინარე სეზონში მე-2 ტიტული (პირველი ესპანეთის სუპერთასია) მოიპოვოს.

სცენარი, რომელიც არცერთ კულეს სურს,  "რეალ მადრიდისა" და მადრიდის "ატლეტიკოს" მოგება და "ბარსას" "ესპანიოლთან" ვერგამარჯვებაა, რადგან ამ შემთხვევაში ჩემპიონობა მინიმუმ მომდევნო ტურამდე გადაიდება.

მე-2 სცენარი "ბარსელონას" ჩემპიონს ხდის - თუ "რეალ მადრიდი" (შაბათს, "ხეტაფესთან") და "ატლეტიკო" (კვირას, "ელჩესთან") ვერ მოიგებენ, "ბარსელონა" ჩემპიონი ბურთის გაგორების გარეშე, "ესპანიოლთან" მატჩამდე გახდება.

თუ ასე მოხდება, ეს სულ მე-3 შემთხვევა იქნება, როცა "ბარსელონა" ლა ლიგას იდენტურ სტილში მოიგებს. აქამდე ეს 1990/91 წლების სეზონში მოხდა, როცა "ატლეტიკომ" "რეალ სოსიედადთან" წააგო და ასევე 2008/09 წლების სეზონში, როცა "რეალ მადრიდი" "ვილიარეალთან" დამარცხდა.

9 ჩემპიონობა გასვლაზე

იმის გათვალისწინებით, რომ რომელიმე მადრიდულ კლუბი, დიდი ალბათობით, 3 ქულას აიღებს, "ბარსელონას" ამ ტურში ჩემპიონობისთვის "ესპანიოლის" გასვლაზე დამარცხება დასჭირდება. თუ ასე მოხდება, ეს მე-10 შემთხვევა იქნება, როცა კლუბი ჩემპიონი სტუმრად თამაშისას გახდება. "ბარსამ" ეს ლა ლიგის პირველ სეზონშიც მოახერხა.

1928/29 წლების სეზონში კატალონიური გრანდი ჩემპიონი ბასკური "არენას დე გეჩოს" სტადიონზე გახდა. 13 წლის შემდეგ, 1958/59 წლების სეზონის ბოლოსწინა ტურში "ატლეტიკოსთან" მოგებით ელენიო ერერას შეგირდებმა ისტორიული ჩემპიონობა იზეიმეს - იმ სეზონში გუნდმა 24 მატჩი მოიგო, 3 ფრედ დაასრულა და მხოლოდ 3 წააგო, გარდა ამისა, 96 გოლი გაიტანა და მხოლოდ 26 გაუშვა.

სარეკორდო სეზონში მოპოვებული ტიტულიდან კრუიფამდე

"ბარსელონა" ჩემპიონი გასვლაზე მესამედ იოჰან კრუიფის დროს გახდა, როცა 1973/74 წლების სეზონში "ხიხონი" დაამარცხა, მეოთხედ კი ეს 1984/85 წლების სეზონში "ვალიადოლიდთან" მოგებით (2-1) მოხდა.  მე-20 საუკუნეში "ბარსამ" ესპანეთის ჩემპიონობა მსგავსად კიდევ ერთხელ იზეიმა, როდესაც ლუი ვან გაალის გუნდმა ვიტორიაში "ალავესი" 4-1 გაანადგურა.

რაც შეეხება 21-ე საუკუნეს: 2004/05 წლების სეზონში "ლევანტესთან" გასვლაზე სამუელ ეტო'ოს მიერ გატანილი გოლი და ფრედ დასრულებული მატჩი პირველი ადგილის გასანაღდებლად საკმარისი აღმოჩნდა. 2010/11 წლების სეზონში გუნდი ჩემპიონი ასევე ფრედ თამაშის შემდეგ გახდა, როდესაც "სიუტატ დე ვალენსიაზე" სეიდუ კეიტამ გაიტანა და შეხვედრა 1-1 დასრულდა.

ბოლო 2 ასეთი შემთხვევა გასულ დეკადაში მოხდა. 2015/16 წლების სეზონში "ბარსელონამ" "გრანადა" სტუმრად 3-0 დაამარცხა, 2 სეზონის შემდეგ კი ასევე გასვლაზე, "რიასორზე" 4-2 იმარჯვა და 4 ტურით ადრე ჩემპიონი გახდა.

ჩემპიონობა პირველ ტაიმში

2005/06 წლების სეზონის ბოლოსწინა ტურში ლიდერი "ბარსელონა" ვიგოში თამაშობდა, ამ მატჩამდე ერთი საათით ადრე კი მეორეადგილოსანი "ვალენსია" "მალიორკას" ხვდებოდა. საბოლოოდ, "ღამურებმა" 1-2 წააგეს, რაც ნიშნავდა, რომ "ბარსა" მე-2 ტაიმის დაწყებამდე უკვე ჩემპიონი იყო.

"ბალაიდოსზე" ანგარიში 0-0 იყო, მაგრამ "ბარსელონამ" შესვენებაზე უკვე იცოდა, რომ ჩემპიონობა გადაღებული ჰქონდა. მიუხედავად ამისა, კატალონიურმა გრანდმა "სელტას" სემუელ ეტო'ოს გოლით 1-0 მოუგო.

შესაძლოა, ეს შემთხვევაც ბურთის გაგორების გარეშე მოპოვებულ ჩემპიონობად ჩავთვალოთ, თანაც გასვლაზე.