ბარსელონას კარასკოს აბდე ეზალზული ურჩევნია

მომდევნო სეზონისთვის "ბარსელონა" მარცხენა შემტევად აბდე ეზალზულის დამატებას განიხილავს და არა იანიკ კარასკოს. ინფორმაციას ამის შესახებ Sport-ის ჟურნალისტი ფერან კორეასი ავრცელებს.

იანვარში მემფის დეპაი "ბარსელონადან" 3 მილიონ ევროდ გადავიდა. გარიგება ითვალისწინებდა იმასაც, რომ "ბარსელონას" "ატელტიკოს" შემტევის, იანიკ კარასკოს შესყიდვის უფლება ექნებოდა. გავრცელებული ცნობებით საუბარია 15 მილიონ ევროზე.

Sport-ის ცნობით "ბარსელონა" აპირებს, კარასკოს ყიდვის უფლება არ გამოიყენოს და მარცხენა შემტევად "ოსასუნაში" განათხოვრებული აბდე ეზალზული გამოიყენოს.

ახალგაზრდა მაროკოელი "ბარსას" მხოლოდ იმ შემთხვევაში დატოვებს, თუ მის სანაცვლოდ კლუბი მნიშვნელოვან შეთავაზებას მიიღებს, რომელიც "ბლაუგრანას" ფინანსური ფეარ ფლეის მოთხოვნების დაკმაყოფილებაში დაეხმარება. ასეთ შემთხვევაში აბდეს ტრანსფერიდან მიღებული თანხის ნაწილით "ბარსელონა" იანიკ კარასკოს შეიძენს.

აბდე ეზალზული "ოსასუნაში" სწორედ შეტევის მარცხენა ფლანგზე თამაშობს. მის ანგარიშზე 29 მატჩში 5 გოლი და 2 საგოლე გადაცემაა.