ბარსელონა 2-1 რეალ მადრიდი | მიმოხილვა

"ბარსელონამ" "კამპ ნოუზე", ლა ლიგის 26-ე ტურში ქამბექი შემოგვთავაზა და "რეალ მადრიდს" 2-1 მოუგო.

მატჩი "ბარსას" უპირატესობით დაიწყო, თუმცა არ გაუმართლა და მე-9 წუთზე მადრიდელები რონალდ არაუხოს ავტოგოლით დაწინაურდნენ. მიუხედავად ამისა, ტაიმის მიწურულს სერჟი რობერტომ წონასწორობა აღადგინა და ტაბლოზე უფრო სამართლიანი შედეგი დაფიქსირდა.

მეორე ნახევარში გუნდებს რამდენიმე საგოლე მომენტი ჰქონდათ, განსაკუთრებით ლევანდოვსკისა და რაფინიას, მაგრამ ვერ გაიტანეს. "ბლანკოსის" მხრიდან ქარიმ ბენზემამ კარგი შანსი გაანიავა, მარკო ასენსიომ კი შეაგდო, მაგრამ გოლი თამაშგარე მდგომარეობის გამო გაუქმდა.

საბოლოოდ, მატჩს ბრწყინვალე დასასრული ჰქონდა - 92 წუთზე ფრანკ კესიემ ლა ლიგაში სადებიუტო გოლი გაიტანა და "ბარსელონა" "რეალ მადრიდთან" დრამატულ ბრძოლაში მოაგებინა. გოლი ბრწყინვალე კომბინაციას მოჰყვა - ლევანდოვსკიმ ალექს ბალდეს ბურთი ქუსლით გააყოლა, ამ უკანასკნელმა საჯარიმოში გამჭოლი პასი გააკეთა, კოტ-დ'ივუარელმა კი ტიბო კურტუას კარი ერთი შეხებით აიღო.

შედეგად, "ელ კლასიკოს" მოგების შემდეგ კატალონიურმა კლუბმა 68 ქულა დააგროვა და "რეალ მადრიდს" უკვე 12 ქულით უსწრებს, რაც ჩემპიონობისკენ გადადგმული დიდი ნაბიჯია. 

აღსანიშნავია, რომ დღეს "ბარსელონამ" ისტორიაში "რეალ მადრიდის" წინააღმდეგ მე-100 მატჩი მოიგო.