რონალდინიომ თავისი ოქროს ბურთი ბარსელონას მუზეუმს გადასცა

ამიერიდან, "ბარსელონას" ფანებს კატალონიური კლუბის მუზეუმში რონალდინიოს მიერ 2005 წელს მოგებული "ოქროს ბურთის" ნახვა შეეძლებათ.

ბრაზილიელმა ლეგენდამ უპირესტიჟულესი ინდივიდუალური ჯილდო "ბარსას" მუზეუმს თავად გადასცა. ადგილზე იმყოფებოდა პრეზიდენტი ჟოან ლაპორტაც, ისევე, როგორც რაფა იუსტე (ვიცეპრეზიდენტი) და ჟორდი პენასი (მუზეუმის დირექტორი).

რონალდინიომ, რომელიც ინსტიტუციონალურ ღონისძიებებზე "ბარსელონას" ამბასადორია, კლუბს 2017 წელს დაჰპირდა, რომ "ოქროს ბურთს" მუზეუმს გადასცემდა. ახლა კი, როცა პანდემია დასრულდა და თან პრეზიდენტის პოსტზე ჟოან ლაპორტა (რომელთანაც გაუჩოს შესანიშნავი ურთიერთობა აქვს) დაბრუნდა, მისი პირობა შესრულდა.

რონალდინიო "ბარსელონაში" 2003-2008 წლებში თამაშობდა. ლურჯ-ბროწეულისფერი მაისურით მის ანგარიშზე 207 მატჩი, 94 გოლი და 70 ასისტია.