არგენტინა მსოფლიო ჩემპიონია!

არგენტინამ მსოფლიო ჩემპიონატის ფინალში საფრანგეთი დაამარცხა და აღნიშნული ტურნირი ისტორიაში მესამედ მოიგო.

ანგარიში 23-ე წუთზე გაიხსნა - დემბელეს მიერ დი მარიას წაქცევისთვის დანიშნული პენალტი ლიონელ მესიმ გოლად აქცია და გახდა პირველი ფეხბურთელი, რომელსაც გოლი მუნდიალის ყველაზე ეტაპზე გაუტანია; საფრანგეთმა არგენტინას ვერაფერი დაუპირისპირა და შესანიშნავი კონტრშეტევის შემდეგ, 36-ე წუთზე დი მარიამ თავისი გუნდის უპირატესობა 2 ბურთამდე გაზარდა.

თამაშს მეორე ტაიმშიც არგენტინა აკონტროლებდა, თუმცა შეტევებში ისე ხშირად აღარ მიდიოდა. მიუხედავად იმისა, რომ საფრანგეთის თამაშს მატჩის შემომტრიალებლისა არაფერი ეტყობოდა, კილიან მბაპემ მე-80 წუთზე პენალტით 1 ბურთი გაქვითა, ერთი წუთის შემდეგ კი ანგარიში გაათანაბრა და შეხვედრა დამატებით დროში გადაიყვანა.

მეორე დამატებით ტაიმში, 109-ე წუთზე ლეო მესიმ არგენტინა კვლავ წინ გაიყვანა და მსოფლიო ჩემპიონობას ისევ მიუახლოვდა, მაგრამ მბაპემ პენალტით წონასწორობა კვლავ აღადგინა და მატჩი 3-3 დასრულდა.

პენალტების სერიაში არგენტინამ 4-2 მოიგო - "ალბისელესტეს" მხრიდან თერთმეტმეტრიანები ლიონელ მესიმ, პაულო დიბალამ, ლეანდრო პარედესმა და გონსალო მონტიელმა გაიტანეს, ფრანგთა რიგებში კი თავიანთი დარტყმები კილიან მბაპემ და რანდალ კოლო მუანიმ გამოიყენეს, კინგსლი კომანს ემილიანო მარტინესმა აუღო, ორელიენ ჩუამენიმ კი ააცილა.

შესაბამისად, ლიონელ მესის ოცნება ახდა - არგენტინა მსოფლიო ჩემპიონია. "ალბისელესტემ" ტურნირი მესამედ მოიგო: 1978, 1986 და აწ უკვე 2022 წლებში.