ბარსას გულშემატკივრები პსჟ-ს წინააღმდეგ - სასამართლო მოსმენა 18 ოქტომებრს გაიმართება

ლიონელ მესი "პარი სენ-ჟერმენში" ახალი გადასული იყო, როდესაც გავრცელდა ინფორმაცია, რომ "ბარსელონას" გულშემატკივრების (კლუბის წევრების) ნაწილმა პარიზული კლუბის წინააღმდეგ სასამართლოში სარჩელი შეიტანა და მესის კონტრაქტის გაუქმება მოითხოვა.

მაშინ ეს სარჩელი სერიოზულად არავინ მიიღო, მაგრამ დღეს ცნობილი გახდა, რომ თავად სასამართლოს მიუღია. Cadena Ser-ის ცნობით ევროკავშირის ტრიბუნალი საქმის განხილვას იწყებს და პირველი მოსმენა 18 ოქტომბერს ლუქსემბურგში გაიმართება.

საინტერესოა, რომ საჩივრის ავტორები "ბარსელონას" ფრანგი გულშემატკივრები არიან. ისინი უჩივიან "პარი სენ-ჟერმენსა" და საფრანგეთს იმისათვის, რომ უთანასწორო პირობებით სარგებლობენ. საქმე ისაა, რომ ევროპის სხვადასხვა ქვეყანაში საფეხბურთო ფინანსური ფეარ ფლეის სხვადასხვა წესები მოქმედებს. წესი, რომლის გამოც მესი იძულებული გახდა, "ბარსელონა" დაეტოვებინა, საფრანგეთში არ მოქმედებს. ეს წესი რომ საფრანგეთში მოქმედი ყოფილიყო, პსჟ არგენტინელის დამატებას ვერ მოახერხებდა. გულშემატკივრებს მიაჩნიათ, რომ ასეთი მიდგომა უსამართლობაა და ის, ვისაც ამ საკითხის მოგვარება ევალება, ანუ UEFA, არაფერს აკეთებს.

გულშემატკივრების ინტერესებს იცავს ადვოკატი ხუან ბლანკო, რომლის იურიდიული ფირმა ცოტა ხნის წინ ლა ლიგამ დაიქირავა. საქმე იდენტურია - კილიან მბაპეს კონტრაქტი "პარი სენ-ჟერმენთან".

ორივე შემთხვევაში მომჩივანი ფეხბურთელებთან გაფორმებული კონტრაქტის ანულირებას ითხოვს, ასევე იმ პირების დასჯას, რომლებმაც სარგებელი მიიღეს, ანუ "პარი სენ-ჟერმენის".

ხუან ბრანკო აცხადებს, რომ მესის შემთხვევაში, სავარაუდოდ, ზუსტი მიზანი მიღწეული ვერ იქნება, რადგან როდესაც სასამართლო მოსმენები დასრულდება, პსჟ-სთან მისი კონტრაქტიც უკვე ამოწურული იქნება. თუმცა მას და მის კლიენტებს სურთ, რომ ევროპულ ფეხბურთში ჯანსაღი გარემო შექმნან.

ამ საკითხზე UEFA-მ ნაწილობრივ უკვე იზრუნა. უახლოესი 3 წლის განმავლობაში ძალაში ახალი ფინანსური ფეარ ფლეი შევა, რომლის ერთი კომპონენტიც სწორედ იმის მსგავსი წესებია, რაც ესპანეთში მოქმედებს და რომლის გამოც მესი იძულებული გახდა, "ბარსელონა" დაეტოვებინა.