ბარსელონელები ნაკრებებში: 2 გოლი და არცერთი ტრავმა

შვიდმა "ბარსელონელმა" ითამაშა დღეს ნაკრებში და რაც არ უნდა გასაკვირად ჟღერდეს, ტრავმა არცერთს მიუღია.

ესპანეთი-შვეიცარია 1-2

ესპანელთა სასტარტო შემადგენლობაში ექვსივე "ბარსელონელი" ვიხილეთ. გარსიამ, ალბამ, ბუსკეტსმა და გავიმ 90 წუთი ითამაშეს, ტორესი 63 წუთზე შეცვალეს, პედრი კი - 70-ეზე.

ესპანეთმა პირველი ტაიმი წააგო. თამაშის განახლებიდან ათ წუთში ჟორდი ალბამ მარკო ასენსიოს ძალიან კარგი თამაშისა და პასის შემდეგ გაათანაბრა, თუმცა შვეიცარიელებმა წინ გასვლა მალევე მოახერხეს. ბოროტი ენები ამბობენ, ესპანელთა კარში მე-2 გოლი ემბოლოს არ გაუტანია, ერიკ გარსიას კისერზე ავტოგოლიაო, მაგრამ UEFA ემბოლოს უთვლის და ჩვენ ვინ გვრჯის, გარსიას რომ დავაბრალოთ.

ამ წაგების გამო ესპანეთმა ერთა ლიგის ჯგუფში პირველი ადგილი დაკარგა, რომლის დასაბრუნებლადაც ბოლო ტურში პორტუგალიაში აუცილებლად მოგება ჭირდება.

კოტ დ'ივუარი-ტოგო 2-1

ფრანკ კესიეს კოტ-დ'ივუარმა ამხანაგურ მატჩში ტოგო დაამარცხა. "ბარსას" ნახევარმცველმა სრულად ითამაშა, 68-ე წუთზე თერთმეტმეტრიანიც გაიტანა და ანგარიში 2-0 გახადა.