ბარსელონა მარკო ასენსიოს სიტუაციას აკვირდება
მომდევნო ზაფხულში "ბარსელონამ", შესაძლოა, მადრიდის "რეალის" ფეხბურთელი დაიმატოს. საუბარი მარკო ასენსიოზეა.
Mundo Deportivo-ს ცნობით კატალონიურ კლუბში ასენსიოს კონტრაქტთან დაკავშირებით შექმნილ ვითარებას აკვირდებიან და არაა გამორიცხული, 2023 წლის იანვრიდან "ბლაუგრანა" ესპანელი შემტევის ტრანსფერის მიმართულებით გააქტიურდეს.
"ბარსელონაში" ასენსიოს ასაკი და სათამაშო დონე მოსწონთ. ესპანელი ჯერ 26 წლისაა და მას კარიერის დიდი ნაწილი წინ აქვს. წინა სეზონში მარკომ "რეალის" მაისურით 12 გოლი გაიტანა, რაც მის მაღალ კლასს ხაზს უსვამს, თუმცა ისიც აშკარაა, რომ ვინისიუსის, როდრიგოსა და ფედე ვალვერდეს გუნდში ყოფნის პირობებში ასენსიოს სათამაშო დრო არ მიეცემა და დიდი შანსია, მან მადრიდული გუნდი თავისუფალი აგენტის სტატუსით დატოვოს.
"ბარსელონამ" მიმდინარე წელს შეტევა მნიშვნელოვნად გააძლიერა, მაგრამ თუ შესაფერისი ვარიანტი გამოჩნდება, კატალონიელები მის გამოყენებას შეეცდებიან. გასათვალისწინებელია, რომ ფეხბურთელის აგენტი ჟორჟე ჟეზუსია, ჟოან ლაპორტას ახლო მეგობარი.
მარკო ასენსიო მარჯვენა შემტევია, თუმცა მას თამაში მარცხენა ფლანგსა და ცენტრშიც შეუძლია.
"ბარსელონა" მარკოს ასენსიოს დამატებასთან ახლოს ჯერ კიდევ იმ დროს იყო, როდესაც ფეხბურთელი "მალიორკაში" გამოდიოდა, მაგრამ 2014 წელს კატალონიელებმა ფეხბურთელში 3.9 მილიონი ევროს გადახდაზე უარი თქვეს.
ამ სიახლეზე კომენტარები გათიშულია.
კომენტარები [ 12 ]